ప్రభుత్వ ఉద్యోగులకు ఐఐటీ, ఐఐఎంలతో శిక్షణ: ఏపీ సీఎం చంద్రబాబు

ప్రభుత్వ ఉద్యోగులకు నైపుణ్యాభివృద్ధి శిక్షణ నిరంతర ప్రక్రియగా కొనసాగాలని ఆంధ్రప్రదేశ్ ముఖ్యమంత్రి నారా చంద్రబాబు నాయుడు స్పష్టం చేశారు. ప్రభుత్వ సేవలపై ఉన్నతాధికారులతో నిర్వహించిన సమీక్షలో ఉద్యోగుల నైపుణ్య శిక్షణ, అన్న క్యాంటీన్లు, పట్టణ ప్రాంతాల్లో తాగునీటి సరఫరా, సంక్షేమ హాస్టళ్లలో వసతులపై చర్చించారు. ఐగాట్-కర్మయోగి ద్వారా ఉద్యోగులకు వివిధ కోర్సుల్లో శిక్షణ అందిస్తున్నామని, మారుతున్న సాంకేతిక అవసరాలకు అనుగుణంగా వారు తమ నైపుణ్యాలను ఎప్పటికప్పుడు మెరుగుపరుచుకోవాలని సీఎం సూచించారు. ఉద్యోగులకు అవసరమైన ప్రత్యేక శిక్షణ కోసం ఐఐటీలు, ఐఐఎంలతో కలిసి కార్యక్రమాలు నిర్వహించే చర్యలు తీసుకోవాలని అధికారులను ఆదేశించారు.

పట్టణాలు, గ్రామాల్లో తాగునీటి సమస్య తలెత్తకుండా అధికారులు నిరంతరం పర్యవేక్షించాలని చంద్రబాబు ఆదేశించారు. ఇటీవల కురిసిన వర్షాలతో పట్టణాల్లో తాగునీటి సమస్య చాలా వరకు తగ్గిందని అధికారులు సీఎంకు వివరించారు. రాయలసీమలోని రెండు మున్సిపాలిటీల్లో స్వల్ప సమస్యలు ఉన్నాయని, వాటిని పరిష్కరించేందుకు చర్యలు తీసుకుంటున్నామని తెలిపారు. విశాఖపట్నంలో భూగర్భ జలాలు రీచార్జ్ కావడంతో తాగునీటి సమస్యను అధిగమిస్తున్నామని అధికారులు వెల్లడించారు. ప్రభుత్వం చేపట్టే వివిధ కార్యక్రమాల్లో ప్రజల భాగస్వామ్యాన్ని పెంచాలని సీఎం సూచించారు.