ఎల్‌నినో ప్రభావంపై తుమ్మల కీలక వ్యాఖ్యలు

సూపర్ ఎల్‌నినో ప్రభావంతో భద్రాద్రి కొత్తగూడెం జిల్లాలో ఉష్ణోగ్రతలు 50 డిగ్రీలు దాటే అవకాశం ఉందని తెలంగాణ మంత్రి తుమ్మల నాగేశ్వరరావు పేర్కొన్నారు. సోమవారం అశ్వాపురం మండలం అమ్మగారిపల్లి వద్ద గోదావరి ఆనకట్ట పనులను ఆయన పరిశీలించారు. దుమ్ముగూడెం ఆనకట్టపై మీటరు ఎత్తున ఇసుక బస్తాలు ఏర్పాటు చేసి, ఒక టీఎంసీ నీటిని నిల్వ చేసేలా చర్యలు తీసుకుంటామని తెలిపారు. ఈ పనులను దసరా రోజున ప్రారంభించనున్నట్లు వెల్లడించారు. ముఖ్యమంత్రి రేవంత్‌రెడ్డి ఆదేశాల మేరకు పనులను చేపట్టనున్నట్లు చెప్పారు.

ఎల్‌నినో ప్రభావంతో వర్షాలు తగ్గి భూగర్భ జలాలు అడుగంటుతున్నాయని, గోదావరిలోనూ నీటి కొరత ఏర్పడుతోందని మంత్రి తెలిపారు. తాగునీటి ఇబ్బందులు తలెత్తకుండా, చేతికొచ్చే పంటలు ఎండిపోకుండా నీటిని నిల్వ చేయాల్సిన అవసరం ఉందన్నారు. నీటి లభ్యత, విద్యుత్ ఉత్పత్తిపై ప్రభావాన్ని దృష్టిలో ఉంచుకుని రైతులు తక్కువ నీరు అవసరమయ్యే పంటలను సాగు చేయాలని సూచించారు. వరి సాగు విషయంలో నీటి లభ్యతను పరిగణనలోకి తీసుకోవాలని కోరారు. గోదావరి నీటిని నిల్వ చేసే అంశాన్ని ముఖ్యమంత్రి దృష్టికి తీసుకెళ్లగా, ఆనకట్టపై ఇసుక బస్తాలు ఏర్పాటు చేసే పనులను వెంటనే చేపట్టాలని అధికారులను ఆదేశించినట్లు తుమ్మల తెలిపారు.