ఏపీలో పేదల ఇళ్లకు శంకుస్థాపన చేసిన కేంద్ర మంత్రి చౌహాన్

తెనాలి నియోజకవర్గంలోని బుర్రిపాలెంలో పేదల ఇళ్ల నిర్మాణానికి ముఖ్యమంత్రి చంద్రబాబు నాయుడు, కేంద్ర మంత్రి శివరాజ్ సింగ్ చౌహాన్ కలిసి శంకుస్థాపన చేశారు. లబ్ధిదారు కుటుంబంతో కలిసి త్రీడీ ప్రింటింగ్ ఇంటి నిర్మాణానికి భూమిపూజ నిర్వహించారు. ఈ సందర్భంగా లబ్ధిదారు కుటుంబానికి నూతన వస్త్రాలను అందజేశారు. సీఎం, కేంద్ర మంత్రి చేతుల మీదుగా తమ ఇంటికి భూమిపూజ జరగడం సంతోషంగా ఉందని లబ్ధిదారు మహిళ భారతి తెలిపారు. అనంతరం జరిగిన బహిరంగ సభలో కేంద్ర మంత్రి చౌహాన్ ప్రసంగిస్తూ.. చంద్రబాబు నేతృత్వంలో ఆంధ్రప్రదేశ్ అభివృద్ధి దిశగా ముందుకు సాగుతోందని అన్నారు.

ప్రస్తుతం చేపట్టిన మూడు లక్షల ఇళ్ల నిర్మాణం పూర్తయ్యేలోగా మరో మూడు లక్షల ఇళ్లను మంజూరు చేస్తామని, అదనంగా మరో మూడు లక్షల ఇళ్లను కూడా ఏపీకి కేటాయిస్తామని చౌహాన్ హామీ ఇచ్చారు. రాష్ట్ర అభివృద్ధికి ప్రధాని మోదీ నేతృత్వంలోని కేంద్ర ప్రభుత్వం అండగా ఉంటుందని తెలిపారు. రైతులకు కేంద్రం అందిస్తున్న రూ.6 వేలతో పాటు రాష్ట్ర ప్రభుత్వం మరో రూ.14 వేలు కలిపి ‘అన్నదాత సుఖీభవ’ కింద రూ.20 వేలు అందిస్తోందని పేర్కొన్నారు. గ్రామాల్లో రోడ్లు, డ్రెయిన్లు, తాగునీటి వసతులు వంటి మౌలిక సదుపాయాల అభివృద్ధికి కేంద్రం సహకరిస్తుందని చెప్పారు. గత పాలనలో ఏపీకి నష్టం జరిగిందని విమర్శించిన చౌహాన్.. ఎన్డీఏ ప్రభుత్వాలు రాష్ట్రాన్ని అభివృద్ధి పథంలో ముందుకు తీసుకెళ్తున్నాయని అన్నారు.