యమధర్మరాజు ప్రతిష్ఠించిన సూర్యుడు.. కాశీలో యమాదిత్యుని విశిష్టత ఇదే!

ప్రత్యక్ష దైవంగా భావించే సూర్యభగవానుడిని ఆరాధిస్తే ఆరోగ్యం, ఐశ్వర్యం, జ్ఞానం, విజయాలు లభిస్తాయని శాస్త్రవచనం. అందుకే దేశవ్యాప్తంగా సూర్యనారాయణుడికి అంకితమైన అనేక ఆలయాలు ఉన్నాయి. వాటిలో కాశీలోని ద్వాదశ ఆదిత్య క్షేత్రాలకు ప్రత్యేక ప్రాధాన్యం ఉంది. ముక్తి క్షేత్రంగా ప్రసిద్ధి చెందిన వారణాసిలోని ఈ ఆదిత్య ఆలయాల్లో యమాదిత్యుని ఆలయం కూడా ఒకటి. ‘ఆరోగ్యం భాస్కరాదిచ్ఛేత్’ అనే శాస్త్రవచనం ప్రకారం ఆరోగ్య ప్రదాత అయిన సూర్యభగవానుడిని భక్తిశ్రద్ధలతో ఆరాధిస్తారు. కవిసార్వభౌమ శ్రీనాథుడు రచించిన ‘కాశీ ఖండం’లోనూ యమాదిత్యుని క్షేత్ర విశేషాలు ప్రస్తావించబడ్డాయి.

కాశీలోని సింధియా ఘాట్ సమీపంలోని సంకట దేవి ఆలయానికి చేరువలో యమాదిత్యుడు కొలువై ఉన్నట్లు స్థలపురాణం చెబుతోంది. సూర్యభగవానుడి కుమారుడైన యమధర్మరాజు తన భటుల తప్పిదానికి ప్రాయశ్చిత్తంగా కాశీలో సూర్యమూర్తిని ప్రతిష్ఠించి ఆరాధించాడని విశ్వాసం. యముడు ప్రతిష్ఠించిన ఆదిత్యుడు కావడంతో ఆయనను ‘యమాదిత్యుడు’గా పూజిస్తారు. అలాగే యమధర్మరాజు ప్రతిష్ఠించిన శివలింగం ‘యమేశ్వర స్వామి’గా ప్రసిద్ధి చెందింది. యమేశ్వర స్వామి, యమాదిత్యుని దర్శిస్తే మోక్షం, శాశ్వత స్వర్గప్రాప్తి కలుగుతాయని భక్తుల విశ్వాసం. ముఖ్యంగా మంగళవారం, చతుర్దశి ఒకే రోజున వచ్చినప్పుడు గంగాస్నానం చేసి యమాదిత్యుని దర్శిస్తే అనారోగ్య సమస్యలు, అపమృత్యు భయాలు తొలగి పాపాలు నశిస్తాయని నమ్మకం.