ధురంధర్ దర్శకుడి భార్య సంచలన నిర్ణయం!

ధురంధర్ ఫ్రాంచైజీతో ఆదిత్య ధర్ పేరు దేశవ్యాప్తంగా మార్మోగిపోయింది. ఈ 2 సినిమాలు సృష్టించిన ప్రభంజనంతో ఆయన తదుపరి ప్రాజెక్ట్‌పై భారీ ఆసక్తి నెలకొంది. ఇలాంటి సమయంలో ఆదిత్య ధర్, ఆయన భార్య యామీ గౌతమ్ కలిసి కీలక నిర్ణయం తీసుకున్నట్లు తెలుస్తోంది. న్యూఢిల్లీకి చెందిన ఆదిత్య ధర్, హిమాచల్ ప్రదేశ్‌కు చెందిన యామీ గౌతమ్ బాలీవుడ్‌లో అవకాశాల కోసం ముంబైకి వచ్చారు. అక్కడ ఏర్పడిన పరిచయం క్రమంగా ప్రేమగా మారి 2021లో పెళ్లికి దారితీసింది. హిమాచల్ ప్రదేశ్‌లోని యామీ ఇంట్లోనే వీరి వివాహం జరిగింది. ఇప్పుడు అదే ప్రాంతానికి శాశ్వతంగా మకాం మార్చాలని ఈ దంపతులు భావిస్తున్నారట. ప్రస్తుతం ముంబై కంటే అక్కడే ఎక్కువ సమయం గడుపుతున్నట్లు సమాచారం. సినిమా పనులు ఉన్నప్పుడు మాత్రమే ముంబైకి వెళ్లి, మిగతా సమయాన్ని సొంతింట్లో గడపాలని అనుకుంటున్నారట.

యామీకి హిమాచల్ ప్రదేశ్‌తో ఎంతో ప్రత్యేకమైన అనుబంధం ఉంది. పెళ్లికి ముందే మండిలోని గోహర్ ప్రాంతంలో 100 ఏళ్ల పురాతన ఇంటితో పాటు సుమారు 25 ఎకరాల భూమిని ఆమె కొనుగోలు చేసింది. చెక్క, రాళ్లతో నిర్మించిన ఆ ఇంటి చుట్టూ సేంద్రియ పద్ధతిలో సాగుచేసే తోటలు ఉన్నాయి. అక్కడ యాపిల్స్, బంగాళాదుంపలు, ప్లమ్స్, అల్లం వంటి పంటలు పండిస్తున్నట్లు సమాచారం. ఇన్నాళ్లూ సినీ కెరీర్ కారణంగా ముంబైలోనే ఎక్కువగా ఉండాల్సి వచ్చిన ఈ జంట, ఇకపై ప్రశాంతమైన హిమాచల్ జీవితాన్ని ఎంచుకోవాలని నిర్ణయించుకున్నట్లు తెలుస్తోంది. అదే జరిగితే చిత్రీకరణ సమయంలో ముంబైలో, మిగతా రోజుల్లో హిమాచల్ ప్రదేశ్‌లో ఉండే అవకాశం కనిపిస్తోంది.