ఫ్యాటీ లివర్ తగ్గాలంటే భోజనం మానొద్దు: వైద్యులు

భారతదేశంలో ఫ్యాటీ లివర్ సమస్య వేగంగా పెరుగుతోంది. పబ్‌మెడ్‌లో ప్రచురితమైన అధ్యయనాల ప్రకారం దేశంలోని వయోజనుల్లో సుమారు 38–39 శాతం మందికి ఈ సమస్య వచ్చే ప్రమాదం ఉంది. ప్రారంభ దశలో లక్షణాలు కనిపించకపోయినా, నిర్లక్ష్యం చేస్తే ఇది లివర్ సిర్రోసిస్ వంటి తీవ్రమైన సమస్యలకు దారితీసే అవకాశం ఉంది. ప్రస్తుతం చాలామంది గ్రేడ్-1 దశలో ఉన్నారని నిపుణులు చెబుతున్నారు, ఈ దశలో జీవనశైలి మార్పులతో నియంత్రణ సాధ్యమే.

నిపుణుల ప్రకారం, రాత్రి భోజనం పూర్తిగా మానేయడం వల్ల ఫ్యాటీ లివర్ నయమవుతుందనే శాస్త్రీయ ఆధారాలు లేవు. దానికి బదులుగా రోజంతా చిన్న మోతాదుల్లో సమతుల ఆహారం తీసుకోవడం, రాత్రి భోజనం త్వరగా చేయడం మంచిది. బరువును నియంత్రించడం, వారానికి 150–300 నిమిషాలు వ్యాయామం చేయడం, చక్కెర పదార్థాలను తగ్గించడం, ప్రోటీన్ అధికంగా ఉండే ఆహారం తీసుకోవడం ద్వారా కాలేయ ఆరోగ్యం మెరుగుపడుతుంది.