తిరుమల శ్రీవారి దర్శనంలో బోయపాటి శ్రీను..

ప్రముఖ దర్శకుడు బోయపాటి శ్రీను కుటుంబ సభ్యులతో కలిసి తిరుమల శ్రీవారిని దర్శించుకున్నారు. ఆలయ అధికారులు ఆయనకు ప్రత్యేక దర్శన ఏర్పాట్లు చేశారు. దర్శనం అనంతరం రంగనాయక మండపంలో వేద పండితులు వేద ఆశీర్వచనం అందించగా.. అధికారులు స్వామివారి తీర్థప్రసాదాలను అందజేశారు. ఆలయం వెలుపలకు వచ్చిన బోయపాటి శ్రీనితో ఫొటోలు దిగేందుకు అభిమానులు, భక్తులు ఆసక్తి చూపించారు.

ఈ సందర్భంగా బోయపాటి శ్రీను మాట్లాడుతూ.. భారతదేశంలో తెలుగు చిత్ర పరిశ్రమ అగ్రస్థానంలో ఉందని అన్నారు. ‘అఖండ-3’ తప్పకుండా ఉంటుందని, అయితే అందుకు కొంత సమయం పడుతుందని తెలిపారు. చిరంజీవి, బాలకృష్ణ, నాగార్జున, వెంకటేష్ తెలుగు చిత్ర పరిశ్రమకు ప్రధాన స్తంభాలుగా నిలిచారని కొనియాడారు. అలాంటి అగ్ర హీరోలతో సినిమా చేయాలంటే వారి స్థాయికి తగ్గ కథలు అవసరమని, అలాంటి కథలు దొరికితే తప్పకుండా వారితో సినిమాలు చేస్తానని పేర్కొన్నారు.