

టాలీవుడ్లో కమెడియన్గా కెరీర్ ప్రారంభించిన ప్రియదర్శి.. హీరోగా వరుస విజయాలను అందుకుంటూ తనకంటూ ప్రత్యేక గుర్తింపు తెచ్చుకున్నారు. ఎప్పటికప్పుడు విభిన్నమైన కథలను ఎంచుకుంటూ ప్రేక్షకులను అలరిస్తున్న ఈ టాలెంటెడ్ నటుడు.. ఇప్పుడు 'ఇడుపు కాయితం' సినిమాతో థియేటర్లలో సందడి చేసేందుకు సిద్ధమవుతున్నారు. అందమైన ఫ్యామిలీ డ్రామాగా తెరకెక్కుతున్న ఈ చిత్రంపై ప్రేక్షకుల్లో ఆసక్తి పెరుగుతోంది. ఈ క్రమంలో తాజాగా చిత్ర బృందం 'గోగులు గోగులు.. గోపాల కృష్ణుడు..' అనే పెళ్లి పాటను విడుదల చేసింది. దీంతో సినిమా ప్రమోషన్లలో మరింత జోష్ కనిపిస్తోంది.
ప్రియదర్శి, నాగదుర్గ జంటగా నటిస్తున్న ఈ చిత్రానికి యువ దర్శకుడు దొండపాటి వంశీరెడ్డి దర్శకత్వం వహిస్తున్నారు. డిసెంబర్ 11న ప్రపంచవ్యాప్తంగా థియేటర్లలో విడుదల కానున్న ఈ సినిమాను బన్నీ వాస్ వర్క్స్, సుకుమార్ రైటింగ్స్ బ్యానర్లపై బన్నీ వాస్, తబిత సుకుమార్ సంయుక్తంగా నిర్మిస్తున్నారు. శ్రీనివాస్, శ్రీలత పాత్రల పెళ్లి వేడుక నేపథ్యంలో రూపొందించిన ఈ పాటలో పల్లెటూరి పెళ్లిళ్ల సంప్రదాయాలు, సందడి, నలుగు వేడుకను అందంగా చూపించారు. జానపద శైలిలో సాగే సాహిత్యం, ఉత్సాహభరితమైన సంగీతం పాటకు ప్రత్యేక ఆకర్షణగా నిలుస్తున్నాయి. సురేష్ బొబ్బిలి సంగీతం అందించగా, కొంగరి కృష్ణ సాహిత్యం సమకూర్చారు. అభిక్య తనికెళ్ల, తరుణి, రచిత రాయప్రోలు, జయశ్రీ పల్లెం, స్నిగ్ధ శర్మ తమ గాత్రంతో పాటకు మరింత అందాన్ని తీసుకొచ్చారు. జానపద పాటలతో గుర్తింపు పొందిన నాగదుర్గ ఈ సినిమాతో కథానాయికగా పరిచయం అవుతున్నారు. ప్రియదర్శి కామెడీ టైమింగ్, నాగదుర్గ సహజమైన నటన, పల్లెటూరి నేపథ్యం సినిమాకు ప్రధాన ఆకర్షణలుగా నిలుస్తాయని ప్రేక్షకులు ఆశిస్తున్నారు.














కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!