ఓజీ 2 కథపై ఇంట్రెస్టింగ్ అప్డేట్

పవర్ స్టార్ పవన్ కళ్యాణ్ హీరోగా దర్శకుడు సుజీత్ రూపొందించిన ‘ఓజీ’ తొలి భాగం విడుదల సమయంలో భారీ ఓపెనింగ్స్ సాధించి అభిమానులను ఆకట్టుకుంది. యాక్షన్ సన్నివేశాలు, హీరో ఎలివేషన్స్, థ్రిల్లింగ్ బ్యాక్‌గ్రౌండ్ స్కోర్ సినిమాకు ప్రధాన బలాలుగా నిలిచాయి. అయితే కథనం మరింత బలంగా ఉండాల్సిందనే అభిప్రాయం ప్రేక్షకుల్లో వ్యక్తమైంది. ఈ నేపథ్యంలో ఇప్పుడు అందరి దృష్టి ‘ఓజీ 2’ (ప్రీక్వెల్) పై పడింది. హీరో గతం, పాత్రల నేపథ్యం, సంఘటనల ఆరంభాన్ని మరింత విస్తృతంగా చూపించేలా కథను సిద్ధం చేస్తున్నట్లు సినీ వర్గాల్లో ప్రచారం జరుగుతోంది.

మొదటి భాగంపై వచ్చిన స్పందనను విశ్లేషించిన చిత్రబృందం ఈసారి కథ, స్క్రీన్‌ప్లేకు అత్యధిక ప్రాధాన్యం ఇస్తోందని సమాచారం. పవన్ కళ్యాణ్ పాత్రను మరింత శక్తివంతంగా ఆవిష్కరించేలా భావోద్వేగాలు, యాక్షన్, డ్రామాను సమతూకంగా మేళవించే ప్రయత్నం జరుగుతోందని టాక్ వినిపిస్తోంది. తొలి భాగంలో మిగిలిన ప్రశ్నలకు ఈ ప్రీక్వెల్‌లో సమాధానాలు లభించే అవకాశముందని అభిమానులు ఆసక్తిగా ఎదురుచూస్తున్నారు. అయితే ఈ విషయాలపై చిత్రబృందం నుంచి అధికారిక ప్రకటన రావాల్సి ఉంది.