‘వారణాసి’ విషయంలో జక్కన్న స్పీడ్ మామూలుగా లేదే!

దర్శకధీరుడు ఎస్ఎస్ రాజమౌళి సినిమాలు సుదీర్ఘకాలం పాటు తెరకెక్కుతాయనే అభిప్రాయం ఇండియన్ సినీ పరిశ్రమలో ఉంది. బాహుబలి సిరీస్, ఆర్ఆర్ఆర్ వంటి చిత్రాలకు ఏళ్ల సమయం తీసుకున్న జక్కన్న.. ఈసారి మాత్రం వారణాసి విషయంలో తన ట్రేడ్‌మార్క్‌కు భిన్నంగా వేగంగా ముందుకు సాగుతున్నారు. సూపర్‌స్టార్ మహేష్ బాబు హీరోగా తెరకెక్కుతున్న ఈ పాన్ వరల్డ్ ప్రాజెక్ట్ భారీ యాక్షన్ సన్నివేశాలు, అంతర్జాతీయ స్థాయి విజువల్స్, అత్యాధునిక సాంకేతికతతో రూపొందుతోంది. ప్రత్యేక క్యూ అండ్ ఏ సెషన్‌లో రాజమౌళి మాట్లాడుతూ.. ఇప్పటికే 90 శాతానికి పైగా షూటింగ్ పూర్తయినట్లు వెల్లడించారు.

వారణాసి షూటింగ్ వేగం ఇప్పుడు అభిమానులు, ట్రేడ్ వర్గాల్లో చర్చనీయాంశంగా మారింది. ఈ సినిమా మేజర్ షూటింగ్ దాదాపు 606 రోజుల్లో పూర్తయినట్లు సమాచారం. మిగిలిన షూటింగ్‌తో పాటు పోస్ట్ ప్రొడక్షన్, విజువల్ ఎఫెక్ట్స్, ఇతర సాంకేతిక పనులను కూడా వేగంగా పూర్తి చేసేందుకు చిత్రబృందం సిద్ధమవుతోంది. మహేష్ బాబుకు జోడీగా ప్రియాంక చోప్రా జోనస్ నటిస్తుండగా, మలయాళ స్టార్ పృథ్వీరాజ్ సుకుమారన్ కీలక పాత్రలో కనిపించనున్నారు. వారణాసి 2027 ఏప్రిల్ 7న ప్రేక్షకుల ముందుకు రానుంది. ఈ నేపథ్యంలో సినిమాపై అంచనాలు మరింత పెరుగుతున్నాయి.