తెలంగాణపై మాధవీలత వ్యాఖ్యలు రాజకీయ దుమారం..

బీజేపీ నాయకురాలు, నటి మాధవీలత తెలంగాణ అంశంపై చేసిన సోషల్ మీడియా పోస్టులు రాజకీయ వర్గాల్లో చర్చనీయాంశంగా మారాయి. ఫేస్‌బుక్‌లో వరుస పోస్టులు చేసిన ఆమె, తెలంగాణకు సంబంధించిన కొన్ని వ్యాఖ్యలను ప్రస్తావిస్తూ విభజనవాద భావజాలంతో పోల్చారు. కొందరు వ్యక్తులు ప్రజలను తెలంగాణ నుంచి వెళ్లిపోవాలని సూచిస్తున్నారని ఆరోపిస్తూ, అలాంటి అభిప్రాయాలు జాతీయ సమైక్యతకు విరుద్ధమని పేర్కొన్నారు. ఆమె చేసిన వ్యాఖ్యలు సోషల్ మీడియాలో విస్తృత చర్చకు దారితీశాయి.

మరో పోస్టులో తాను 2005 నుంచి హైదరాబాద్‌లోనే నివసిస్తున్నానని పేర్కొన్న మాధవీలత, తనను లక్ష్యంగా చేసుకుని కొందరు విమర్శలు చేస్తున్నారని ఆవేదన వ్యక్తం చేశారు. తెలంగాణ భారతదేశంలో అంతర్భాగమని గుర్తుచేస్తూ, విభజన భావజాలాన్ని ప్రోత్సహించే ధోరణులను ఆమె తప్పుబట్టారు. అయితే ఆమె వ్యాఖ్యలపై భిన్నాభిప్రాయాలు వ్యక్తమవుతున్నాయి. కొందరు మద్దతు తెలుపుతుండగా, మరికొందరు ఈ వ్యాఖ్యలు అనవసర వివాదానికి కారణమయ్యాయని విమర్శిస్తున్నారు.