ఏఐ డీప్‌ఫేక్‌లపై మంచు విష్ణు ఆగ్రహం..

ప్రస్తుతం హాట్‌టాపిక్‌గా మారిన ఏఐ డీప్‌ఫేక్‌ ఘటనలపై మూవీ ఆర్టిస్ట్స్‌ అసోసియేషన్‌ (MAA) అధ్యక్షుడు మంచు విష్ణు తీవ్ర ఆగ్రహం వ్యక్తం చేశారు. ఇది కేవలం ఒక ఘటనగా చూడకుండా.. భవిష్యత్తులో సినీ పరిశ్రమ ఎదుర్కొనే ప్రమాదాలకు హెచ్చరికగా భావించాలని అన్నారు. డీప్‌ఫేక్‌లపై రామ్‌ పోతినేని చేసిన వ్యాఖ్యలను ప్రస్తావించిన విష్ణు.. ఆన్‌లైన్‌ ఖాతాలను ఆధార్‌తో అనుసంధానం చేయాలన్న ఆయన సూచనపై విస్తృతంగా చర్చ జరగాల్సిన అవసరం ఉందన్నారు. భావ వ్యక్తీకరణ స్వేచ్ఛను గౌరవించాల్సిందేనని, అయితే దాన్ని అడ్డుపెట్టుకుని అజ్ఞాతంగా ఇతరులను వేధించడం, వారి ఫొటోలు లేదా వ్యక్తిత్వాన్ని దుర్వినియోగం చేయడం ఎవరికీ హక్కు కాదని స్పష్టం చేశారు. వీడియో తొలగించడం లేదా ఫిర్యాదు చేయడం మాత్రమే సమస్యకు శాశ్వత పరిష్కారం కాదని, తెలుగు ఫిల్మ్‌ ఛాంబర్‌, ప్రొడ్యూసర్స్‌ కౌన్సిల్‌, MAAతో పాటు పరిశ్రమలోని అన్ని వర్గాలు కలిసి ఏఐ డీప్‌ఫేక్‌లు, ఆన్‌లైన్‌ దుష్ప్రచారాలను ఎదుర్కొనేందుకు శాశ్వత వ్యవస్థను ఏర్పాటు చేయాలని కోరారు.

ఇక సినిమాలు, నటులు, దర్శకులను లక్ష్యంగా చేసుకుని విడుదలకు ముందే ఉద్దేశపూర్వకంగా నెగెటివ్‌ ప్రచారం చేయడంపైనా మంచు విష్ణు స్పందించారు. విమర్శలు, రివ్యూలు, ట్రోలింగ్‌ సినిమా ప్రపంచంలో సహజమేనని.. అయితే ప్రేక్షకులు సినిమా చూసే అవకాశం రాకముందే దాన్ని దెబ్బతీయాలని ప్రయత్నించడం మాత్రం ఏమాత్రం ఆమోదయోగ్యం కాదన్నారు. ది ప్యారడైజ్‌ చిత్ర బృందం కూడా ఇలాంటి ప్రచారాల నుంచి రక్షణ కోరుతూ కోర్టును ఆశ్రయించాల్సి వచ్చిందని గుర్తుచేశారు. ఒక సినిమా విజయం లేదా వైఫల్యం మొత్తం టాలీవుడ్‌ పరిశ్రమను నిర్వచించదని, పరిశ్రమ అందరిదని పేర్కొన్నారు. MAA అధ్యక్షుడిగా ఈ అంశాన్ని సీరియస్‌గా తీసుకుంటున్నానని, నటుల ఫొటోలను దుర్వినియోగం చేస్తూ అసభ్యకరమైన కంటెంట్‌ను రూపొందించే ఖాతాలు, ప్రజలను తప్పుదోవ పట్టించే ఆన్‌లైన్‌ అకౌంట్ల వివరాలను MAA సేకరిస్తోందని తెలిపారు. “ప్రతి శుక్రవారం పోటీ పడొచ్చు.. కానీ మిగిలిన వారమంతా ఒకరినొకరు నాశనం చేసుకునేందుకు ప్రయత్నించకూడదు. సినిమాను గెలవనివ్వండి” అని విష్ణు పేర్కొన్నారు.