గోరేగావ్‌ ఫిల్మ్‌ సిటీలో భారీ అగ్నిప్రమాదం.. ‘రామాయణం’ సెట్‌పై క్లారిటీ

ముంబైలోని గోరేగావ్ ఫిల్మ్ సిటీలో సోమవారం (అక్టోబర్ 5) భారీ అగ్నిప్రమాదం చోటుచేసుకుంది. ప్రైమ్ ఫోకస్ స్టూడియో వెనుక తాత్కాలిక షూటింగ్‌ నిర్మాణంలో ఉన్న ప్రొడక్షన్ కంట్రోల్ రూమ్‌ యూనిట్‌లో మధ్యాహ్నం 4.02 గంటల సమయంలో మంటలు చెలరేగాయి. ఎలక్ట్రికల్ వైరింగ్, ఏసీ యూనిట్లు, కేబుల్స్, షూటింగ్ సామగ్రి తదితరాలు మంటలకు ఆహుతయ్యాయి. సమాచారం అందుకున్న ముంబై ఫైర్ బ్రిగేడ్, పోలీసులు, అత్యవసర సిబ్బంది 50 నిమిషాల్లో మంటలను అదుపులోకి తీసుకొచ్చారు. ఎలాంటి ప్రాణనష్టం జరగలేదని అధికారులు తెలిపారు.

ఈ ప్రమాదం నితేష్ తివారీ దర్శకత్వంలో రణ్‌బీర్ కపూర్, సాయి పల్లవి నటిస్తున్న ‘రామాయణం’ సినిమా సెట్‌లో జరిగిందంటూ తొలుత ప్రచారం జరిగింది. అయితే తాజా వివరాల ప్రకారం మంటలు ‘రామాయణం’ సెట్‌కు బయట ఉన్న తాత్కాలిక నిర్మాణంలో చెలరేగినట్లు తెలుస్తోంది. సమీపంలో ‘పతి పత్ని ఔర్ పంగా 2’, ‘ఎంటీవీ హజల్ 5’ షూటింగ్‌లు జరుగుతున్నప్పటికీ, రెండు బృందాల్లోని వారంతా సురక్షితంగా ఉన్నారు. ఈ ఘటన నేపథ్యంలో ఫిల్మ్ సిటీలో భద్రతా ప్రమాణాలను మరింత కట్టుదిట్టం చేయాలని సినీ కార్మికుల సంఘాలు సూచించాయి.