‘ఫౌజీ’కు బాలీవుడ్ నుంచి భారీ పోటీ.. బాక్సాఫీస్ యుద్ధానికి రంగం సిద్ధం..!

రెబల్ స్టార్ ప్రభాస్ హీరోగా హను రాఘవపూడి దర్శకత్వంలో తెరకెక్కుతున్న పీరియాడిక్ యాక్షన్ డ్రామా ‘ఫౌజీ’ విడుదల తేదీపై నెలకొన్న ఉత్కంఠకు తెరపడింది. ఈ చిత్రాన్ని 2026 డిసెంబర్ 3న ప్రపంచవ్యాప్తంగా విడుదల చేయనున్నట్లు మేకర్స్ అధికారికంగా ప్రకటించారు. సైనికుడి పాత్రలో ప్రభాస్ కనిపించనున్న ఈ చిత్రంపై ఇప్పటికే భారీ అంచనాలు నెలకొన్నాయి. ఇటీవల విడుదలైన పోస్టర్ ప్రేక్షకుల్లో మరింత ఆసక్తిని పెంచింది. పాన్ ఇండియా స్థాయిలో రూపొందుతున్న ఈ చిత్రం ప్రభాస్ కెరీర్‌లో మరో కీలక ప్రాజెక్ట్‌గా భావిస్తున్నారు.

అయితే విడుదల తేదీ ప్రకటించగానే బాలీవుడ్‌లో భారీ పోటీ నెలకొనే పరిస్థితి కనిపిస్తోంది. డిసెంబర్ 4న అజయ్ దేవ్గన్, సంజయ్ దత్, తమన్నా ప్రధాన పాత్రల్లో నటిస్తున్న ‘రేంజర్’ విడుదలకు సిద్ధమవుతుండగా, అక్షయ్ కుమార్ హీరోగా అనీస్ బజ్మీ తెరకెక్కిస్తున్న కామెడీ ఎంటర్‌టైనర్ కూడా అదే వారాంతాన్ని లక్ష్యంగా పెట్టుకుంది. దీంతో ముఖ్యంగా హిందీ మార్కెట్‌లో తీవ్ర పోటీ తప్పదని ట్రేడ్ వర్గాలు అంచనా వేస్తున్నాయి. ‘ది రాజా సాబ్’ తర్వాత ప్రభాస్ నుంచి వస్తున్న మరో ప్రతిష్టాత్మక చిత్రం కావడంతో ‘ఫౌజీ’పై అంచనాలు మరింత పెరిగాయి. ఇమాన్వి హీరోయిన్‌గా నటిస్తున్న ఈ చిత్రంలో మిథున్ చక్రవర్తి, అనుపమ్ ఖేర్, జయప్రద కీలక పాత్రల్లో కనిపించనున్నారు.