కొత్త ప్రేమకథతో ప్రేక్షకుల ముందుకు వస్తున్న సుహాస్‌

‘మండాడి’ చిత్రంలో ప్రతినాయకుడిగా నటించి మంచి గుర్తింపు తెచ్చుకున్న సుహాస్‌. ఇప్పుడు ‘హైడ్‌ అండ్‌ సిల్క్‌’ అనే హృదయాన్ని హత్తుకునే ప్రేమకథతో ప్రేక్షకుల ముందుకు రానున్నారు. ‘లబ్బర్‌ పండు’, ‘డీసీ’ చిత్రాలతో గుర్తింపు పొందిన సంజన కృష్ణమూర్తి ఈ సినిమాలో కథానాయికగా నటిస్తున్నారు. చిత్రబృందం తాజాగా టైటిల్‌ ప్రోమోను విడుదల చేసింది. ఇందులో సుహాస్‌ మగ్గంపై చీరలు నేసే వ్యక్తిగా కనిపిస్తున్నారు. ఆయన తండ్రి పాత్రలో నటించిన తనికెళ్ల భరణి.. ప్రతి చీర ఒక ప్రత్యేకమైన మహిళ కోసం రూపొందుతుందని, ఆ మహిళ ధరించినప్పుడే దానికి అసలైన అందం వస్తుందని చెబుతారు.

తండ్రి మాటలతో స్ఫూర్తి పొందిన సుహాస్‌ పాత్ర తొలిసారి ఒక చీరను నేస్తుంది. ఆ చీరను ధరించే మహిళను ఆమెకు తెలియకుండా కలవాలని కోరుకుంటుంది. స్టోన్‌ బెంచ్‌ స్టూడియోకు చెందిన కార్తికేయన్‌ సంతానం ఈ చిత్రంతో తెలుగు చిత్ర పరిశ్రమలోకి అడుగుపెడుతున్నారు. వర్థిక జైన్‌కు చెందిన మిస్రిలాల్‌ పిక్చర్స్‌తో కలిసి ఈ సినిమాను నిర్మిస్తున్నారు. రాజేంద్ర బాలా దర్శకుడిగా పరిచయమవుతుండగా, అమృత్‌ రామనాథ్‌ సంగీతం అందిస్తున్నారు. ప్రేమ, చీర చుట్టూ అల్లుకున్న కథాంశంతో టైటిల్‌ ప్రోమో ఆసక్తిని పెంచుతోంది.