ది ప్యారడైజ్’ టీజర్‌కు అదిరే రెస్పాన్స్

దర్శకుడు శ్రీకాంత్ ఓదెల తన తొలి చిత్రం ‘దసరా’తో విమర్శకుల ప్రశంసలతో పాటు భారీ విజయాన్ని అందుకున్నారు. ఇప్పుడు అదే కాంబినేషన్‌లో న్యాచురల్ స్టార్ నానితో తెరకెక్కిస్తున్న ‘ది ప్యారడైజ్’ చిత్రంపై భారీ అంచనాలు నెలకొన్నాయి. శ్రీ లక్ష్మీ వెంకటేశ్వర సినిమాస్ (ఎస్‌ఎల్‌వీ సినిమాస్) బ్యానర్‌పై సుధాకర్ చెరుకూరి నిర్మిస్తున్న ఈ చిత్రంలో కయాదు లోహర్ హీరోయిన్‌గా నటిస్తుండగా, సోనాలి కులకర్ణి, మోహన్ బాబు, రాఘవ్ జుయల్, సంపూర్ణేష్ బాబు కీలక పాత్రల్లో కనిపించనున్నారు. ఇప్పటికే విడుదలైన పోస్టర్లు, గ్లింప్స్ సినిమాపై ఆసక్తిని మరింత పెంచాయి.

తాజాగా విడుదలైన ‘ది ప్యారడైజ్’ టీజర్ ప్రేక్షకుల్లో భారీ ఆసక్తిని రేకెత్తించింది. ఇందులో నాని కనిపించిన యాక్షన్, ఇంటెన్స్ లుక్, పవర్‌ఫుల్ డైలాగ్స్ సినిమాపై ఉన్న అంచనాలను మరింత పెంచాయి. టీజర్‌కు ప్రేక్షకుల నుంచి విశేష స్పందన లభిస్తుండగా, ఈ చిత్రం బాక్సాఫీస్ వద్ద సంచలన విజయం సాధించే అవకాశాలు ఉన్నాయని సినీ వర్గాలు అభిప్రాయపడుతున్నాయి. ఈ సినిమా 2026 సెప్టెంబర్ 24న తెలుగు, తమిళం, కన్నడ, మలయాళం, హిందీ, బెంగాలీ, స్పానిష్, ఇంగ్లీష్ భాషల్లో ప్రపంచవ్యాప్తంగా విడుదల కానుంది.