తెలుగు వర్షన్‌ బుకింగ్స్‌లో దూసుకెళ్తోన్న టాక్సిక్‌

కన్నడ రాకింగ్‌ స్టార్‌ యష్‌ హీరోగా కియారా అద్వానీ, రుక్మిణి వసంత్‌, తారా సుతారియా, హుమా ఖురేషి హీరోయిన్స్‌గా, నయనతార మరో ముఖ్య పాత్రలో నటిస్తున్న భారీ చిత్రం ‘టాక్సిక్‌’. గీతూ మోహన్‌ దాస్‌ దర్శకత్వంలో రూపొందుతున్న ఈ యాక్షన్‌ చిత్రంపై ప్రేక్షకుల్లో భారీ అంచనాలు నెలకొన్నాయి. ఇప్పటికే యూఎస్‌ మార్కెట్‌లో ప్రీమియర్స్‌ బుకింగ్స్‌ ప్రారంభం కాగా, అక్కడ తెలుగు వర్షన్‌ హవా చూపిస్తున్నట్లు సమాచారం. కన్నడ, తెలుగు భాషల్లో బుకింగ్స్‌ అందుబాటులోకి రాగా, ప్రస్తుతానికి తెలుగు వర్షన్‌ ముందంజలో ఉన్నట్లు తెలుస్తోంది. దీంతో తెలుగు రాష్ట్రాల్లోనూ ఈ చిత్రానికి భారీ ఓపెనింగ్స్‌ దక్కే అవకాశాలు కనిపిస్తున్నాయి. ఇతర భాషలతో పోలిస్తే తెలుగు ప్రేక్షకుల్లో సినిమా పట్ల ఆసక్తి గణనీయంగా ఉండటం చిత్రబృందానికి సానుకూల అంశంగా మారింది. ఇప్పటికే యష్‌కు తెలుగులో మంచి మార్కెట్‌ ఏర్పడటంతో ఈ బుకింగ్స్‌ ట్రెండ్‌ ఆసక్తిని పెంచుతోంది.

చిత్రానికి రవి బసృర్‌ సంగీతం అందిస్తున్నారు. యష్‌, కే వి ఎన్‌ ప్రొడక్షన్స్‌ సంస్థలు సంయుక్తంగా ఈ భారీ చిత్రాన్ని నిర్మిస్తున్నాయి. కథ, యాక్షన్‌ అంశాలతో రూపొందిన ఈ సినిమాను పాన్‌ ఇండియా స్థాయిలో ప్రేక్షకుల ముందుకు తీసుకురావడానికి సన్నాహాలు చేస్తున్నారు. అమెరికా ప్రీమియర్స్‌కు స్పందన పెరుగుతున్న నేపథ్యంలో విడుదలకు ముందే సినిమా వసూళ్లపై చర్చ మొదలైంది. ప్రస్తుతం తెలుగు వర్షన్‌ బుకింగ్స్‌లో కనిపిస్తున్న ఆధిపత్యం కొనసాగితే ప్రారంభ వసూళ్లు మరింత పెరిగే అవకాశం ఉందని సినీ వర్గాలు భావిస్తున్నాయి. అయితే తుది బుకింగ్స్‌ పూర్తయ్యే సమయానికి ఏ భాషా వర్షన్‌ అత్యధిక వసూళ్లు సాధిస్తుందన్నది ఆసక్తికరంగా మారింది. ఆగష్టు 26న ‘టాక్సిక్‌’ ప్రపంచవ్యాప్తంగా గ్రాండ్‌గా విడుదల కానుంది.