2026–27 లో వచ్చే రెండు రామాయణ ఆధారిత చిత్రాలు పోలికలకు దారితీస్తాయా ?

పౌరాణిక కథలు అన్ని వయస్సుల ప్రేక్షకులను వెంటనే ఆకట్టుకునే జానర్. ప్రస్తుతం హిందీలో నిటేష్ తివారి దర్శకత్వంలో రామాయణ చిత్రం రూపొందుతుండగా, ఇందులో రణ్‌బీర్ కపూర్ శ్రీరాముడి పాత్రలో నటిస్తున్నారు. ఈ చిత్రం 2026 దీపావళికి విడుదల కానుంది. ఇదే సమయంలో దర్శకుడు ఎస్‌ఎస్ రాజమౌళి కూడా రామాయణంలోని ఒక ముఖ్యమైన ఘట్టాన్ని ఆధారంగా తీసుకుని, ఇతర అంశాలతో మిళితం చేస్తూ వారణాసి పేరుతో ఒక భారీ చిత్రాన్ని తెరకెక్కిస్తున్నారు. కలి యుగం–త్రేతా యుగం కలయికతో పాటు టైమ్ ట్రావెల్ అంశం ఇందులో ఉండనుండటం సినిమాపై ఆసక్తిని పెంచుతోంది. ఈ చిత్రం 2027 వేసవిలో విడుదలకు సిద్ధమవుతోంది.

రెండు రామాయణ కాన్సెప్ట్‌పై చిత్రాలు వస్తుండటంతో పోలికలు తప్పవు. భారీ బడ్జెట్‌తో తెరకెక్కుతున్న నిటేష్ తివారి రామాయణను దాటి ప్రేక్షకులను విజువల్స్‌తో ఆకట్టుకోవడం రాజమౌళికి ఒక పెద్ద సవాలే. రాజమౌళిపై ప్రేక్షకులకు అపార విశ్వాసం ఉన్నప్పటికీ, పలు కథాంశాలతో మిళితమైన వారణాసి కథనం, నేరుగా రామాయణను చూపించబోయే మరో చిత్రంతో పోలిస్తే చర్చనీయాంశం కావచ్చు. రామాయణంలోని ఒక కీలక ఘట్టాన్నే తాను తెరకెక్కిస్తానని రాజమౌళి వెల్లడించారు. మహేష్ బాబు శ్రీరాముడిగా కనిపించనున్న ఈ ఎపిసోడ్ వారణాసి హృదయం కానుంది. టైమ్ ట్రావెల్ కాన్సెప్ట్‌తో ఈ పౌరాణిక కథనానికి కొత్త రుచిని తీసుకురానుంది.