యూత్‌ను టార్గెట్ చేస్తున్న కొత్తతరం మూవీ ‘డెలులు’...

క్రియేటివ్ లాంచ్‌ప్యాడ్ బ్యానర్‌పై కొత్తతరం యూత్ మూవీ ‘డెలులు’ తెరకెక్కుతోంది. ప్రస్తుతం జెన్-జీ యువతలో ట్రెండ్ అవుతున్న ‘డెలులు’ అనే పదాన్ని టైటిల్‌గా ఎంచుకోవడంతో సినిమా మొదటి నుంచే ఆసక్తిని పెంచుతోంది. ఇటీవల నిర్వహించిన స్టూడెంట్ ఈవెంట్‌లో చిత్ర బృందం గ్రాండ్‌గా టైటిల్‌ను ప్రకటించింది. సంకీర్త్ కొండా నిర్మాతగా, ప్రీతమ్ కస్తూరి దర్శకుడిగా ఈ సినిమాను రూపొందిస్తున్నారు.

విజయ్ రాజ్‌కుమార్ కథ, అదనపు సంభాషణలు అందించగా, రేష్మిత్ ఎస్ కౌశిక స్క్రీన్‌ప్లే, డైలాగ్స్ రాశారు. విజయ్ రాజ్‌కుమార్, వేణి రావు, అఖిల్ జాక్సన్, సాయి ప్రసన్న, శ్రీరామ మండవ, అభినయ్ తుల ప్రధాన పాత్రల్లో నటిస్తున్నారు. జై రాజ్ నాయుడు సినిమాటోగ్రఫీ అందిస్తుండగా, హరికృష్ణ కూరపాటి ఎడిటర్‌గా, ఆది చేబ్రోలు సంగీత దర్శకుడిగా వ్యవహరిస్తున్నారు. సుభాష్ సాకే సాహిత్యం అందిస్తున్నారు.

‘డెలులు’ అనేది ‘డెలూషనల్’కు షార్ట్ ఫామ్‌గా జెన్-జీ యువతలో ప్రాచుర్యం పొందిన పదం. కలలు, ప్రేమ, ఊహలు, ఆశలు, రియాలిటీకి మధ్య ఉండే ఆసక్తికరమైన ప్రపంచాన్ని ఈ పదం సూచిస్తుంది. అలాంటి ట్రెండింగ్ పదాన్ని టైటిల్‌గా ఎంచుకోవడం సినిమాపై క్యూరియాసిటీని పెంచుతోంది. యూత్‌కు కనెక్ట్ అయ్యే కథ, ఫ్రెష్ ట్రీట్‌మెంట్‌తో ‘డెలులు’ కొత్తతరం ప్రేక్షకులకు వినోదాన్ని అందించేలా రూపొందుతోంది. ఈ సినిమా టీజర్‌ను సెప్టెంబర్ 3న విడుదల చేయనున్నట్లు చిత్ర బృందం ప్రకటించింది.