

కికు యనమల, కశీశ్ ఖాన్ జంటగా నటించిన తెలుగు సర్వైవల్ థ్రిల్లర్ 'కికు చిరంజీవి' మరో ఓటీటీ వేదికపైకి వచ్చింది. నవంబర్ 14 నుంచి ఆహాలో స్ట్రీమింగ్ అవుతున్న ఈ సినిమా, నవంబర్ 18 నుంచి జియోహాట్స్టార్లోనూ అందుబాటులోకి వచ్చింది. శుభ సాయి వెంకట్ దర్శకత్వం వహించిన ఈ చిత్రం ఆగస్టు 28న థియేటర్లలో విడుదలైంది. అయితే బాక్సాఫీస్ వద్ద ఆశించిన స్థాయిలో విజయం సాధించలేదు. కికు ఎంటర్టైన్మెంట్స్ బ్యానర్పై దీప్తి నడిమింటి ఈ సినిమాను నిర్మించారు. ఈశ్వరీరావు, తనికెళ్ల భరణి, శ్రీకాంత్ భరత్ (అయ్యంగార్), వైవా రాఘవ కీలక పాత్రల్లో నటించారు.
ఈ కథ అరకు ప్రాంతంలో ఫోటోగ్రాఫర్గా పనిచేసే చిరంజీవి చుట్టూ తిరుగుతుంది. అతడికి గుండె కుడివైపు ఉండే అరుదైన ఆరోగ్య సమస్య ఉంటుంది. ఎక్కువగా పరిగెత్తితే ఊపిరి ఆడకపోవడంతో పాటు శరీరం నీలం రంగులోకి మారుతుంది. హైదరాబాద్ నుంచి స్నేహితులతో కలిసి అరకు విహారయాత్రకు వచ్చిన మనును చూసి చిరంజీవి ప్రేమలో పడతాడు. అయితే మనును ప్రేమించిన వారిని ఓ వ్యక్తి తన అనుచరులతో కలిసి హత్య చేస్తుంటాడు. ఓ సంఘటన తర్వాత మను కూడా చిరంజీవిని ఇష్టపడుతుంది. దీంతో అతడిని చంపేందుకు ప్రయత్నాలు మొదలవుతాయి. వాటి నుంచి తప్పించుకున్న తర్వాత ఇద్దరూ పెద్దలను ఒప్పించి పెళ్లి చేసుకుంటారు. కానీ పెళ్లిరాత్రి మను తెలుసుకునే ఓ నిజం కథలో కీలక మలుపుగా మారుతుంది. మనును లక్ష్యంగా చేసుకున్నది ఎవరు, వారి ఉద్దేశం ఏమిటి, చిరంజీవి గతం ఏంటి, ఈశ్వరీరావు పాత్ర ఏమిటి అనే విషయాలు సినిమాలో చూడాలి.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!