నెట్‌ఫ్లిక్స్‌లో భారీ లేఆఫ్స్.. దాదాపు 1,000 మంది ఉద్యోగులకు షాక్

ప్రముఖ ఓటీటీ దిగ్గజం నెట్‌ఫ్లిక్స్ దాదాపు 1,000 మంది ఉద్యోగులను తొలగించేందుకు సిద్ధమైనట్లు సమాచారం. ఇది కంపెనీ మొత్తం ఉద్యోగుల్లో సుమారు 6 శాతానికి సమానం. వ్యాపార వృద్ధిని వేగవంతం చేయడం, స్ట్రీమింగ్ మార్కెట్లో పోటీని ఎదుర్కోవడం లక్ష్యంగా ఈ నిర్ణయం తీసుకున్నట్లు తెలుస్తోంది. ప్రొడక్ట్, టెక్నాలజీ, లీగల్, హ్యూమన్ రిసోర్సెస్ విభాగాల్లో పనిచేస్తున్న ఉద్యోగులపై ఈ కోతల ప్రభావం ఎక్కువగా ఉండవచ్చని భావిస్తున్నారు. గత ఏడాది చివరి నాటికి నెట్‌ఫ్లిక్స్‌లో సుమారు 16 వేల మంది పూర్తికాల ఉద్యోగులు పనిచేస్తున్నారు. కో-సీఈఓలు టెడ్ సరాండోస్, గ్రెగ్ పీటర్స్ ఈ నిర్ణయాన్ని ఉద్యోగులకు ఈమెయిల్ ద్వారా తెలియజేసినట్లు సమాచారం. 2022లో సబ్‌స్క్రైబర్ల సంఖ్య తగ్గిన తర్వాత కంపెనీ చేపడుతున్న అతిపెద్ద లేఆఫ్స్ రౌండ్లలో ఇదొకటిగా భావిస్తున్నారు.

సాంప్రదాయ సబ్‌స్క్రిప్షన్లపై మాత్రమే ఆధారపడకుండా ఆదాయాన్ని పెంచుకునేందుకు నెట్‌ఫ్లిక్స్ యాడ్స్, లైవ్ ప్రోగ్రామింగ్, గేమింగ్ రంగాలపై పెట్టుబడులు పెడుతోంది. అయినప్పటికీ కంపెనీ వృద్ధి వేగంపై ఇన్వెస్టర్లు ఆందోళన వ్యక్తం చేస్తున్నారు. ఈ ఏడాది తొలి అర్ధభాగంలో 97 బిలియన్ల వ్యూయింగ్ అవర్స్ నమోదైనప్పటికీ, ఆశించిన స్థాయిలో వృద్ధి కనిపించడం లేదనే అభిప్రాయాలు వ్యక్తమవుతున్నాయి. ఇకపై ఎంగేజ్‌మెంట్ డేటాను ఏడాదికి రెండుసార్లు కాకుండా ఒకేసారి విడుదల చేయాలన్న నిర్ణయం కూడా మార్కెట్ వర్గాల్లో చర్చకు దారితీసింది. మరోవైపు, మార్చిలో అమెరికా మార్కెట్లో యాడ్-ఫ్రీ, యాడ్-సపోర్టెడ్ ప్లాన్ల ధరలను నెట్‌ఫ్లిక్స్ పెంచింది. షేర్ల పతనం, పెరుగుతున్న పోటీ, వృద్ధిపై సందేహాలు వంటి పరిణామాలు కంపెనీ తాజా పునర్వ్యవస్థీకరణ నిర్ణయానికి కారణమై ఉండవచ్చని విశ్లేషకులు భావిస్తున్నారు.