‘ప్రథమ దృష్ట్య కుట్టక్కర్’: ఈ క్రైమ్ మిస్టరీని మీరు ఛేదించగలరా?

షాహాద్ దర్శకత్వంలో తెరకెక్కిన మలయాళ క్రైమ్ థ్రిల్లర్ ‘ప్రథమ దృష్ట్య కుట్టక్కర్’ సెప్టెంబర్ 11న థియేటర్లలో విడుదలై ప్రేక్షకుల నుంచి మంచి స్పందనను అందుకుంది. పార్వతి తిరువోతు ప్రధాన పాత్రలో నటించిన ఈ సినిమా బాక్సాఫీస్ వద్ద రూ.50 కోట్లకు పైగా వసూళ్లు సాధించినట్లు ట్రేడ్ వర్గాల సమాచారం. థియేటర్లలో ఆకట్టుకున్న ఈ చిత్రం ఇప్పుడు ఓటీటీ విడుదలకు సిద్ధమైంది.

ఈ సినిమా అలీనా అబ్రహాం అనే యువతి చుట్టూ సాగుతుంది. కారుణ్య నియామకం కింద పోలీస్ ఉద్యోగం పొందిన ఆమె కథలో కీలకంగా ఉంటుంది. ఓ పోలీస్ స్టేషన్‌లో రాత్రి విధుల్లో ఉన్న కొందరు పోలీసులు అనుకోకుండా ఓ నేరానికి పాల్పడతారు. తమకు పోలీస్ శాఖపై, క్రైమ్ సీన్ విధివిధానాలపై ఉన్న అవగాహనతో ఆధారాలు దొరకకుండా ఆ నేరాన్ని కప్పిపుచ్చేందుకు ప్రయత్నిస్తారు. మరోవైపు సీనియర్ క్రైమ్ బ్రాంచ్ అధికారి ఈ కేసు దర్యాప్తు చేపట్టడంతో పోలీసులకు, దర్యాప్తు అధికారికి మధ్య మైండ్‌గేమ్ మొదలవుతుంది. మ్యాథ్యూ థామస్, వినయ్ ఫోర్ట్ తదితరులు కీలక పాత్రల్లో నటించారు. అక్టోబర్ 9 నుంచి నెట్‌ఫ్లిక్స్‌లో మలయాళం, తెలుగు భాషల్లో ఈ సినిమా స్ట్రీమింగ్ కానుంది.