మహిళా ఎమ్మెల్యేలపై దురుసు ప్రవర్తనను ఖండించిన సీతక్క...

అసెంబ్లీ గేటు వద్ద జరిగిన ఘటనలో బీఆర్‌ఎస్‌ మహిళా ఎమ్మెల్యేల పట్ల కొందరు ఎమ్మెల్యేలు అనుచితంగా, అసభ్యంగా ప్రవర్తించారని మంత్రి సీతక్క తీవ్రంగా విమర్శించారు. ఈ ఘటనకు సంబంధించిన వీడియోను ఆమె విడుదల చేశారు. బీఆర్‌ఎస్‌ మహిళా ఎమ్మెల్యేలు సబితా ఇంద్రారెడ్డి, సునీతా లక్ష్మారెడ్డి, కోవా లక్ష్మీలను ఎమ్మెల్యేలు గంగుల కమలాకర్‌, సుధీర్‌రెడ్డి వెనక నుంచి తోశారని సీతక్క ఆరోపించారు. గంగుల కమలాకర్‌ మహిళా ఎమ్మెల్యేలను వెనక నుంచి నెట్టుకుంటూ ముందుకు వచ్చారని పేర్కొన్నారు.

మీడియా ప్రతినిధులతో మాట్లాడిన సీతక్క.. ఇద్దరు మహిళా ఎమ్మెల్యేల మధ్యలోకి మరో ఎమ్మెల్యే చొరబడాల్సిన అవసరం ఏముందని ప్రశ్నించారు. కోవా లక్ష్మి, సబితా ఇంద్రారెడ్డిపై సొంత పార్టీ ఎమ్మెల్యేలే అనుచితంగా వ్యవహరించారని ఆరోపించారు. మహిళా ఎమ్మెల్యేలను వెనక నుంచి తోసిన ఘటనను సీతక్క తీవ్రంగా ఖండించారు. ఈ వ్యవహారంపై ఆమె ఘాటైన వ్యాఖ్యలు చేయడంతో రాజకీయ వర్గాల్లో చర్చకు దారితీసింది.