‘సైమన్ గో బ్యాక్’ తరహాలో ‘SIR గో బ్యాక్’ ఉద్యమం- రేవంత్ రెడ్డి

ఢిల్లీలో రాహుల్ గాంధీ సహా ప్రతిపక్ష నేతలను పోలీసులు అదుపులోకి తీసుకోవడంపై తెలంగాణ సీఎం రేవంత్ రెడ్డి తీవ్రంగా స్పందించారు. ఓటర్ల జాబితా సవరణకు సంబంధించిన స్పెషల్ ఇంటెన్సివ్ రివిజన్‌ (SIR)ను రద్దు చేయాలని, కేంద్ర ఎన్నికల సంఘం ప్రధాన కమిషనర్ జ్ఞానేష్ కుమార్ రాజీనామా చేయాలని డిమాండ్ చేశారు. రాహుల్ గాంధీ నాయకత్వంలో తమ పోరాటం కొనసాగుతుందని స్పష్టం చేశారు. వందేళ్ల క్రితం దేశంలో “సైమన్ గో బ్యాక్” ఉద్యమం జరిగిందని, ఇప్పుడు “SIR గో బ్యాక్” ఉద్యమం కొనసాగుతోందని రేవంత్ రెడ్డి వ్యాఖ్యానించారు. ఢిల్లీలో రాహుల్ గాంధీ, ప్రియాంక గాంధీ సహా పలువురు ప్రతిపక్ష నేతలను పోలీసులు అదుపులోకి తీసుకున్న నేపథ్యంలో ఈ వ్యాఖ్యలు చేశారు.

రాహుల్ గాంధీ అరెస్టుతో ప్రధాని నరేంద్ర మోదీ, కేంద్ర హోంమంత్రి అమిత్ షాల అసహనం బయటపడిందని రేవంత్ రెడ్డి ఆరోపించారు. ఇప్పటివరకు ఈడీ, సీబీఐ వంటి కేంద్ర దర్యాప్తు సంస్థలను ఉపయోగించుకున్నారని, ఇప్పుడు కేంద్ర ఎన్నికల సంఘాన్ని కూడా బీజేపీ ప్రభుత్వం ఉపయోగించుకుంటోందని విమర్శించారు. కోట్లాది మంది ఓటర్ల పేర్లు జాబితాల నుంచి తొలగించారని ఆయన ఆరోపించారు. అయితే ఎన్నికల జాబితాల సవరణపై ప్రతిపక్షాల ఆరోపణలను ఎన్నికల సంఘం, బీజేపీ ఖండించాయి. SIR ప్రక్రియలో అనర్హులైన ఓటర్లను తొలగించడమే లక్ష్యమని అధికార వర్గాలు చెబుతున్నాయి.