‘రోమాంచకం’ థియేటర్లలో ప్రేక్షకులను నవ్వించిందా?

విడుదల తేదీ: సెప్టెంబర్ 03, 2026

నటీనటులు: సుమంత్ ప్రభాస్, అనంతిక సనీల్‌కుమార్, వెంకటేష్ కాకుమాను, నరేంద్ర రవి, మణి ఏగుర్ల, సాయి సోహన్, ఉపేంద్ర లిమాయే తదితరులు

దర్శకుడు: వేణుగోపాల్ రెడ్డి

నిర్మాతలు: ప్రణయ్ రెడ్డి

సమర్పణ: సందీప్ రెడ్డి వంగా

సంగీత దర్శకుడు: వాసుకి వైభవ్

సినిమాటోగ్రాఫర్: పవన్ పప్పుల

ఎడిటర్: వేణుగోపాల్ రెడ్డి

కథ: అన్వేష్ (సుమంత్ ప్రభాస్) ఒక స్టార్టప్ నడుపుతుంటాడు. చెన్నైకి చెందిన మైథిలి (అనంతిక సనీల్‌కుమార్)తో ప్రేమలో పడతాడు. అన్వేష్‌ను కలిసేందుకు మైథిలి హైదరాబాద్ వచ్చిన తర్వాత అనూహ్యమైన సమస్యలు మొదలవుతాయి. ఆమె రాకతో అన్వేష్, అతని స్నేహితుల గ్యాంగ్ ఎలాంటి ఇబ్బందుల్లో చిక్కుకున్నారు? మైథిలికి అసలు ఏమైంది? ఆ సమస్యల నుంచి అన్వేష్ అండ్ గ్యాంగ్ ఎలా బయటపడ్డారు? అనేదే సినిమా ప్రధాన కథ.

ప్లస్ పాయింట్లు: ‘రోమాంచకం’ ప్రధానంగా సిట్యువేషనల్, సిల్లీ కామెడీపై ఆధారపడి సాగుతుంది. కొన్ని సన్నివేశాలు ‘జాతిరత్నాలు’ తరహా కామెడీని గుర్తు చేస్తూ మంచి వినోదాన్ని అందిస్తాయి. ముఖ్యంగా సెకండ్ హాఫ్‌లో వచ్చే ఫన్ ఎపిసోడ్స్ ప్రేక్షకులను బాగా నవ్విస్తాయి. క్లైమాక్స్‌లో కన్‌ఫ్యూజన్ కామెడీని ఉపయోగించిన విధానం సినిమాకు హైలైట్‌గా నిలిచింది. సుమంత్ ప్రభాస్ కేర్‌ఫ్రీ యువకుడి పాత్రలో ఎంతో ఈజ్‌తో నటించాడు. అనంతికతో అతని కెమిస్ట్రీ కూడా బాగుంది. హీరో స్నేహితులుగా నటించిన వెంకటేష్ కాకుమాను, నరేంద్ర రవి, మణి ఏగుర్ల, సాయి సోహన్ తమ కామెడీ టైమింగ్‌తో సినిమాకు బలంగా నిలిచారు. ముఖ్యంగా నరేంద్ర రవి పంచ్ డైలాగులు, ఫ్రస్ట్రేషన్ ఎక్స్‌ప్రెషన్స్ ఆకట్టుకుంటాయి. ఉపేంద్ర లిమాయే పాత్ర కూడా నవ్వులు పూయిస్తుంది.

మైనస్ పాయింట్లు: సినిమా ప్రారంభమైన తర్వాత అసలు ట్రాక్‌లోకి రావడానికి కొంత సమయం తీసుకుంటుంది. ఫస్ట్ హాఫ్ అక్కడక్కడా నెమ్మదిగా, ఎత్తుపల్లాలతో సాగుతుంది. స్నేహితుల మధ్య వచ్చే ఒక పాట కథా గమనానికి కొంత అడ్డంకిగా అనిపిస్తుంది. దాన్ని కాస్త ట్రిమ్ చేసి ఉంటే బాగుండేది. పూర్తిస్థాయి కామెడీ ఎంటర్‌టైనర్‌గా సాగే కథలో మధ్యలో తీసుకొచ్చిన సెల్ఫ్-రియలైజేషన్ సన్నివేశాలు, ప్రేమకథకు సంబంధించిన ఎమోషన్స్ ఆశించిన స్థాయిలో కనెక్ట్ కాలేదు.

సాంకేతిక విభాగం: వాసుకి వైభవ్ అందించిన సంగీతం ఆహ్లాదకరంగా ఉంది. సినిమా గ్రాఫ్ కాస్త నెమ్మదించిన సందర్భాల్లో ఆయన బ్యాక్‌గ్రౌండ్ స్కోర్ మంచి సపోర్ట్ ఇచ్చింది. పవన్ పప్పుల సినిమాటోగ్రఫీ ఫ్రెష్ లుక్‌తో ఆకట్టుకుంది. పాటల చిత్రీకరణ కూడా బాగుంది. నిర్మాణ విలువలు సినిమాకు తగిన స్థాయిలో ఉన్నాయి. దర్శకుడు వేణుగోపాల్ రెడ్డి బడ్డీ కామెడీని హ్యాండిల్ చేసిన విధానం మెప్పిస్తుంది. అయితే కొన్ని కీలక సన్నివేశాలను మరింత బలంగా తీర్చిదిద్దాల్సిన అవసరం ఉంది. దర్శకుడే ఎడిటింగ్ బాధ్యతలు కూడా చేపట్టడంతో, కొన్ని చోట్ల మరింత షార్ప్ ఎడిటింగ్ ఉంటే సినిమా ఇంకా మెరుగ్గా ఉండేది.

తీర్పు: ‘రోమాంచకం’ ప్రధానంగా వినోదాన్ని అందించే యూత్‌ఫుల్ ఎంటర్‌టైనర్. సుమంత్ ప్రభాస్ నటన, అతని ఫ్రెండ్స్ గ్యాంగ్ మధ్య వచ్చే కామెడీ సన్నివేశాలు సినిమాకు ప్రధాన బలంగా నిలిచాయి. నెమ్మదిగా సాగే ఫస్ట్ హాఫ్, అంతగా కనెక్ట్ కాని ఎమోషనల్ సన్నివేశాలు కాస్త నిరాశపరిచినా, ఎలాంటి అంచనాలు లేకుండా సరదాగా కాసేపు నవ్వుకోవాలనుకునే ప్రేక్షకులకు ఈ వారాంతంలో ‘రోమాంచకం’ మంచి టైమ్‌పాస్ ఆప్షన్.

రేటింగ్: 2.5/5