

విడుదల తేదీ: నవంబర్ 20, 2026
నటీనటులు: దుల్కర్ సల్మాన్, సాత్విక వీరవల్లి, శ్రుతి హాసన్, రుహానీ శర్మ, స్వాసిక తదితరులు
దర్శకుడు: పవన్ సాధినేని
నిర్మాతలు: సందీప్ గున్నం, రమ్య గున్నం
సంగీత దర్శకుడు: జి.వి. ప్రకాశ్ కుమార్
సినిమాటోగ్రాఫర్: సుజిత్ సారంగ్
ఎడిటర్: ప్రవీణ్ కేఎల్
పితృస్వామ్య భావజాలం ఎక్కువగా ఉండే కుటుంబంలో పెరిగిన కల్పన (సాత్విక వీరవల్లి)కు వ్యోమగామి కావాలనే కల ఉంటుంది. అయితే ఆమె తండ్రి కృష్ణ (దుల్కర్ సల్మాన్)తో వివాహం జరిపించడంతో తన ఆశయాలు నెరవేరవని కల్పన బాధపడుతుంది. కానీ కృష్ణ రూపంలో ఆమెకు ఊహించని మద్దతు లభిస్తుంది. కల్పన కలను నిజం చేసేందుకు కృష్ణ అండగా నిలుస్తాడు. తన కలల కోసం ఆమె చేసే ప్రయాణం, ఈ క్రమంలో వారి మధ్య బలపడే అనుబంధమే సినిమా ప్రధాన కథాంశం.
‘ఆకాశంలో ఒక తార’ కథలో మంచి భావోద్వేగం ఉంది. దుల్కర్ సల్మాన్ తెలుగు సినిమా ఎంచుకున్న ప్రతిసారీ ప్రేక్షకులకు గుర్తుండిపోయే అంశాన్ని అందించే ప్రయత్నం చేస్తారు. ఈ సినిమాలోనూ భావోద్వేగాలే ప్రధాన ఆకర్షణగా నిలుస్తాయి. కథానాయకుడు, కథానాయిక మధ్య అనుబంధాన్ని దర్శకుడు ఎంతో అందంగా తెరకెక్కించారు. ఒకరినొకరు అర్థం చేసుకుంటూ, కలలకు అండగా నిలిచే విధానం హృదయానికి హత్తుకుంటుంది. లోతైన సంభాషణలు, కొన్ని సందర్భాల్లో మాటలకంటే మౌనంతో భావాలను పలికించిన తీరు ఆకట్టుకుంటాయి. జి.వి. ప్రకాశ్ కుమార్ సంగీతం కథకు మరింత బలాన్నిచ్చింది.
మహిళా పాత్రలను బలంగా చూపించడంలోనూ ఈ సినిమా ప్రత్యేకతను చాటుకుంది. కల్పన పాత్ర రూపకల్పన బాగుండటంతో పాటు, సాత్విక వీరవల్లి ఎంపిక కూడా సినిమాకు కొత్తదనాన్ని తీసుకొచ్చింది. తొలి చిత్రమైనప్పటికీ ఆమె ఎంతో పరిణతితో నటించింది. కృష్ణ పాత్రలో దుల్కర్ సల్మాన్ తనదైన నటనతో ఆకట్టుకున్నారు. కథానాయిక పాత్రకు ప్రాధాన్యం ఇస్తూ, తాను సహాయక పాత్రలో ఉండేలా నటించడం విశేషం. పితృస్వామ్య భావజాలం, మహిళా సాధికారత వంటి అంశాలను తన పాత్ర ద్వారా దర్శకుడు చర్చించారు. శ్రుతి హాసన్ పాత్ర ప్రభావవంతంగా ఉంది. సాత్వికతో ఆమె తొలిసారి కలిసే సన్నివేశం బాగుంది. బిజిలీ పాత్రలో రుహానీ శర్మ నవ్వులు పంచారు. స్వాసిక, చైతు జొన్నలగడ్డ తమ పాత్రలకు న్యాయం చేశారు.
భావోద్వేగాల పరంగా సినిమా బాగున్నప్పటికీ సాంకేతికంగా కొన్ని లోపాలు కనిపిస్తాయి. రాకెట్ ప్రయోగాలకు సంబంధించిన దృశ్యాలు మరింత మెరుగ్గా ఉండాల్సింది. అంతరిక్షానికి సంబంధించిన సన్నివేశాలను ఇంకాస్త వివరంగా చూపించి ఉంటే బాగుండేది. టెలివిజన్ వార్తా క్లిప్పుల్లో ఏఐ వినియోగాన్ని పూర్తిగా నివారించాల్సింది. కొన్ని సన్నివేశాలు అతిగా అనిపిస్తాయి. ముఖ్యంగా ద్వితీయార్ధంలో అక్కడక్కడా కథనం నెమ్మదిస్తుంది.
జి.వి. ప్రకాశ్ కుమార్ పాటలు, నేపథ్య సంగీతం సినిమాకు ప్రధాన బలంగా నిలిచాయి. సుజిత్ సారంగ్ సినిమాటోగ్రఫీ బాగుంది. ప్రవీణ్ కేఎల్ ఎడిటింగ్ సంతృప్తికరంగా ఉంది. అంతరిక్ష సన్నివేశాల్లో విజువల్ ఎఫెక్ట్స్ మాత్రం అంచనాలను అందుకోలేకపోయాయి. గున్నం గంగరాజు స్క్రీన్ప్లే చక్కగా ఉంది. కథలోని వివిధ దశలను సాఫీగా అనుసంధానించారు. కొన్ని పరిణామాలు వేగంగా సాగినప్పటికీ భావోద్వేగాలు దెబ్బతినకుండా జాగ్రత్తపడ్డారు. పవన్ సాధినేని దర్శకత్వం ఆకట్టుకుంటుంది. ప్రేమ, పట్టుదల, ఆశయాలను సంభాషణల ద్వారా చెప్పిన తీరు ప్రశంసనీయం. ముఖ్యంగా సాత్విక వీరవల్లిని ఎంపిక చేయడం సినిమాకు కొత్తదనాన్ని తీసుకొచ్చింది.
మొత్తంగా ‘ఆకాశంలో ఒక తార’ ఆశయాలు, ప్రేమ, త్యాగం చుట్టూ అల్లుకున్న అందమైన భావోద్వేగ కథ. దుల్కర్ సల్మాన్, తొలి చిత్రంతోనే ఆకట్టుకున్న సాత్విక వీరవల్లి నటన సినిమాకు ప్రధాన ఆకర్షణ. కథానాయకుల మధ్య సన్నివేశాలు, మంచి సంభాషణలు, సంగీతం, దర్శకత్వం సినిమాను ఆసక్తికరంగా నిలబెడతాయి. విజువల్ ఎఫెక్ట్స్, అంతరిక్ష నేపథ్యానికి సంబంధించిన సన్నివేశాల పరిమితి కొన్ని లోపాలుగా కనిపిస్తాయి. అయినప్పటికీ మంచి భావోద్వేగ కథలను ఇష్టపడేవారు ఈ సినిమాను చూడవచ్చు.



కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!