

న్యూజిలాండ్తో తొలి టెస్టులో టీమ్ఇండియా నలుగురు ఫాస్ట్ బౌలర్లతో బరిలోకి దిగనుందని కెప్టెన్ శుభ్మన్ గిల్ చేసిన వ్యాఖ్యలు క్రికెట్ వర్గాల్లో ఆసక్తిని రేకెత్తిస్తున్నాయి. స్టార్ పేసర్ జస్ప్రీత్ బుమ్రా స్థానం దాదాపు ఖాయమైనప్పటికీ, మిగిలిన స్థానాల్లో ఎవరికి అవకాశం దక్కుతుందనేది చర్చనీయాంశంగా మారింది. ముఖ్యంగా హైదరాబాదీ పేసర్ మహ్మద్ సిరాజ్ తుది జట్టులో ఉంటాడా? అనే ప్రశ్న అభిమానుల్లో నెలకొంది. బౌలింగ్ కోచ్ మోర్నీ మోర్కెల్ ఈ విషయంపై స్పష్టత ఇవ్వకుండా, తుది నిర్ణయం కెప్టెన్ గిల్దేనని వెల్లడించాడు. భారత జట్టులో బుమ్రా, ప్రసిద్ధ్ కృష్ణ, ఆకాశ్ దీప్, మహ్మద్ సిరాజ్, గుర్నూర్ బ్రార్తో పాటు పేస్ ఆల్రౌండర్లు నితీశ్ కుమార్ రెడ్డి, అన్షుల్ కాంబోజ్ ఉన్నారు. వీరిలో బుమ్రాతో పాటు మరో పేస్ ఆల్రౌండర్కు చోటు దక్కే అవకాశముండటంతో మిగిలిన స్థానాల కోసం తీవ్ర పోటీ నెలకొంది.
అనుభవం, అంతర్జాతీయ క్రికెట్లో ప్రదర్శనల పరంగా సిరాజ్కు కొంత ఆధిక్యం ఉంది. మరోవైపు ప్రసిద్ధ్ కృష్ణ, గుర్నూర్ బ్రార్ కూడా తమ ప్రదర్శనలతో ఆకట్టుకున్నారు. ఆకాశ్ దీప్కు కూడా అవకాశం ఉన్నప్పటికీ, తొలి టెస్టులో తుది జట్టులో చోటు దక్కడం కష్టంగా కనిపిస్తోంది. బౌలింగ్తో పాటు బ్యాటింగ్ విభాగాన్ని కూడా బలోపేతం చేయడం భారత్కు కీలకం కానుంది. న్యూజిలాండ్ పేసర్లు మ్యాట్ హెన్రీ, కైల్ జేమీసన్, జాకబ్ డఫీలను ఎదుర్కోవాలంటే ఎనిమిదో స్థానం వరకూ బ్యాటింగ్ సామర్థ్యం ఉండాలి. ఓపెనర్లుగా యశస్వి జైస్వాల్, కేఎల్ రాహుల్ బరిలోకి దిగే అవకాశం ఉంది. మూడో స్థానానికి సాయి సుదర్శన్, దేవదత్ పడిక్కల్ మధ్య పోటీ నెలకొంది. శుభ్మన్ గిల్, రిషభ్ పంత్ కీలక బ్యాటర్లుగా ఉండగా, నితీశ్ కుమార్ రెడ్డి, రవీంద్ర జడేజా ఆల్రౌండర్లుగా జట్టుకు బలం చేకూర్చనున్నారు. ఈ నేపథ్యంలో బౌలింగ్ పటిష్ఠత, బ్యాటింగ్ లోతు మధ్య సమతుల్యత సాధిస్తూ టీమ్ మేనేజ్మెంట్ తుది జట్టును ఖరారు చేయనుంది.


కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!