రిటైర్మెంట్ నిర్ణయాన్ని వెనక్కి తీసుకోనున్న నికోలస్ పూరన్?

వెస్టిండీస్ స్టార్ వికెట్ కీపర్ బ్యాటర్ నికోలస్ పూరన్ అంతర్జాతీయ క్రికెట్‌లోకి తిరిగి వచ్చే అవకాశాలపై ఆసక్తికర వ్యాఖ్యలు చేశారు. తాను అంతర్జాతీయ క్రికెట్‌కు పూర్తిగా వీడ్కోలు పలకలేదని, భవిష్యత్తులో ఏం జరుగుతుందో ఇప్పుడే చెప్పలేమని స్పష్టం చేశారు. ప్రస్తుతం యువ ఆటగాళ్లను తీర్చిదిద్దడం, వారికి మార్గనిర్దేశం చేయడంపైనే తన దృష్టి ఉందని వెల్లడించారు.

జూన్ 2025లో పూరన్ అంతర్జాతీయ క్రికెట్‌కు రిటైర్మెంట్ ప్రకటించారు. అయితే వెస్టిండీస్ జాతీయ జట్టులోకి తిరిగి వచ్చేందుకు తలుపులు పూర్తిగా మూసివేయలేదన్న ఆయన వ్యాఖ్యలు అభిమానుల్లో ఆసక్తిని పెంచాయి. తన అంతర్జాతీయ కెరీర్‌లో వన్డేల్లో 1,983 పరుగులు, టీ20ల్లో 2,275 పరుగులు సాధించిన పూరన్.. భవిష్యత్తులో మళ్లీ జాతీయ జట్టు తరఫున ఆడతారా అన్నది ఆసక్తికరంగా మారింది.