వైభవ్‌కు ఇప్పుడే చోటు కష్టం.. గంభీర్ కీలక వ్యాఖ్యలు

15 ఏళ్ల యువ సంచలనం వైభవ్ సూర్యవంశీ పేరు ఇటీవల భారత క్రికెట్‌లో మార్మోగుతోంది. టీ20ల్లో అతని ప్రతిభ, దూకుడైన బ్యాటింగ్‌తో ఆకట్టుకుంటున్నప్పటికీ, టీమిండియా ప్లేయింగ్ ఎలెవన్‌లో స్థానం పొందడం అంత సులభం కాదని హెడ్ కోచ్ గౌతమ్ గంభీర్ స్పష్టం చేశారు. వెస్టిండీస్‌తో ఐదు మ్యాచ్‌ల టీ20 సిరీస్‌కు ముందు జియోస్టార్ నిర్వహించిన ‘ఫాలో ది బ్లూస్: గౌతమ్ గంభీర్ అన్‌ఫిల్టర్డ్’ కార్యక్రమంలో ఆయన మాట్లాడుతూ.. వైభవ్ ప్రతిభపై ఎలాంటి సందేహం లేదని, అయితే సుదీర్ఘకాలంగా జట్టులో రాణిస్తున్న ఆటగాళ్లకు ప్రాధాన్యం ఇవ్వాల్సి ఉంటుందని చెప్పారు.

వైభవ్‌కు అవకాశం ఇవ్వాలంటే సంజూ శాంసన్ లేదా అభిషేక్ శర్మలో ఒకరిని తప్పించాల్సి వస్తుందని, ప్రస్తుతం అది సమంజసం కాదని గంభీర్ అభిప్రాయపడ్డారు. కొన్ని మ్యాచ్‌ల వైఫల్యాలతో ఇప్పటికే జట్టుకు విజయాలు అందించిన ఆటగాళ్లపై నమ్మకం కోల్పోవడం సరైన విధానం కాదన్నారు. బయటి ఒత్తిళ్లు, సోషల్ మీడియా చర్చలు ప్లేయింగ్ ఎలెవన్ ఎంపికను ప్రభావితం చేయవని, జట్టు విజయానికి ఉపయోగపడే అత్యుత్తమ కాంబినేషన్‌కే ప్రాధాన్యం ఉంటుందని స్పష్టం చేశారు. వైభవ్‌కు సరైన అవకాశం వచ్చినప్పుడు దాన్ని పూర్తిగా సద్వినియోగం చేసుకోవడానికి సిద్ధంగా ఉండాలని గంభీర్ సూచించారు.