రక్షణ రంగంలో డ్రోగో ఏరోస్పేస్‌కు మరో ఘనత

హైదరాబాద్‌కు చెందిన డ్రోగో ఏరోస్పేస్‌ స్వదేశీ మానవరహిత వైమానిక వాహనాల తయారీలో మరో కీలక మైలురాయిని సాధించింది. సంస్థ అభివృద్ధి చేసిన జేకే 250ఈ స్థిర-రెక్కల నిలువు టేకాఫ్‌, ల్యాండింగ్‌ డ్రోన్‌కు పౌర విమానయాన డైరెక్టరేట్‌ జనరల్‌ (డీజీసీఏ) నుంచి రకం ధ్రువీకరణ లభించింది. స్థిర-రెక్కలు, బహుళ రోటర్లతో కూడిన సంకర సాంకేతికతతో రూపొందించిన ఈ డ్రోన్‌ శిక్షణ అవసరాల కోసం ఈ గుర్తింపు పొందిన దేశంలోనే తొలి మానవరహిత వైమానిక వాహనమని సంస్థ సీఈఓ యశ్వంత్‌ బొంతు తెలిపారు. తాజా గుర్తింపుతో డ్రోగో ఏరోస్పేస్‌ సాధించిన డీజీసీఏ రకం ధ్రువీకరణల సంఖ్య ఆరుకు చేరింది.

భారత రక్షణ దళాల నిఘా, పర్యవేక్షణ, సమాచార సేకరణ అవసరాలను దృష్టిలో ఉంచుకుని జేకే 250ఈ డ్రోన్‌ను రూపొందించారు. సంప్రదాయ స్థిర-రెక్కల విమానాల సామర్థ్యంతోపాటు నిలువుగా పైకి ఎగరడం, కిందికి దిగడం వంటి సౌకర్యాలు ఉండటంతో రన్‌వే అవసరం లేకుండానే దీనిని వినియోగించవచ్చు. ఈ డ్రోన్‌ రెండు నుంచి మూడు గంటల పాటు గగనతలంలో ఉండగలదు. ఇప్పటికే జేకే 250ఈ డ్రోన్లను భారత సైన్యానికి అందించినట్లు సంస్థ వెల్లడించింది. తాజా ధ్రువీకరణ స్వదేశీ డ్రోన్‌ సాంకేతికత, విమాన భద్రతా ప్రమాణాలు, రక్షణ రంగంలో దేశీయ తయారీ సామర్థ్యాల అభివృద్ధికి కీలక ముందడుగుగా నిలుస్తుందని యశ్వంత్‌ బొంతు పేర్కొన్నారు.