వాట్సాప్‌లో కొత్త ఫీచర్.. వ్యక్తిగత చాట్‌లకు మరింత భద్రత

కస్టమర్ల అభిరుచులు, భద్రతకు ప్రాధాన్యమిస్తూ వాట్సాప్ ఎప్పటికప్పుడు కొత్త ఫీచర్లను అందుబాటులోకి తీసుకొస్తోంది. ఇందులో భాగంగా యూజర్ల వ్యక్తిగత సంభాషణలకు మరింత రక్షణ కల్పించేలా ‘రిస్ట్రిక్టెడ్ చాట్’ ఫీచర్‌ను పరిచయం చేసింది. ప్రస్తుతం ఈ ఫీచర్ బీటా వెర్షన్‌లో అందుబాటులో ఉన్నట్లు సమాచారం. త్వరలోనే సాధారణ ఆండ్రాయిడ్ వినియోగదారులకు కూడా అందుబాటులోకి వచ్చే అవకాశం ఉంది. కార్యాలయాల్లో కంప్యూటర్లు, ల్యాప్‌టాప్‌ల ద్వారా వాట్సాప్ వెబ్‌ను ఉపయోగించేవారికి ఈ ఫీచర్ ప్రత్యేకంగా ఉపయోగపడుతుంది. ఇతరులు ఆ పరికరాలను ఉపయోగించినప్పుడు వ్యక్తిగత సంభాషణలు బయటపడకుండా అదనపు గోప్యతను అందించడం దీని ప్రధాన ఉద్దేశం.

ఈ ఫీచర్‌ను ఉపయోగించుకోవడానికి గోప్యంగా ఉంచాలనుకున్న కాంటాక్ట్ ప్రొఫైల్‌ను తెరిచి, అందులోని ‘రిస్ట్రిక్టెడ్ చాట్’ ఆప్షన్‌ను ఎనేబుల్ చేసుకోవాలి. అవసరాన్ని బట్టి ఎప్పుడైనా దీన్ని నిలిపివేయవచ్చు. ఈ ఫీచర్‌ను యాక్టివేట్ చేసిన చాట్‌లు లింక్ చేసిన కంప్యూటర్లు, ఇతర పరికరాల్లో కనిపించకుండా ఉండటంతో పాటు, వాటిలోని ఫొటోలు, వీడియోలు ఫోన్ గ్యాలరీలో ఆటోమేటిక్‌గా సేవ్ కావు. అలాగే, చాట్‌లను ఎగుమతి చేసే అవకాశం ఉండదు. మెటా ఏఐ ఫీచర్లు కూడా ఈ సంభాషణల్లో పనిచేయవని సమాచారం. వ్యక్తిగత, సున్నితమైన సమాచారాన్ని ఇతరుల కంట పడకుండా ఉంచాలనుకునే వారికి ఈ ఫీచర్ ఉపయోగకరంగా ఉండనుంది.