

జమ్మూకశ్మీర్లో ఉగ్రవాది లతీఫ్ భట్కు సంబంధించిన ఎన్కౌంటర్ నేపథ్యంలో ఓ కమాండో వీడియో సోషల్ మీడియాలో వైరల్గా మారింది. గుబురు గడ్డం, మిలిటరీ గేర్, ఖాకీ కవర్తో ఉన్న ఏకే-203 రైఫిల్తో కనిపిస్తున్న అతడి రగ్గడ్ లుక్ నెటిజన్ల దృష్టిని ఆకర్షిస్తోంది. ఆపరేషన్లలో పాల్గొనే భద్రతా సిబ్బంది వివరాలను సైన్యం సాధారణంగా గోప్యంగా ఉంచుతుంది. అయితే, అతడి యూనిఫామ్పై కనిపిస్తున్న బ్యాడ్జ్ ఆధారంగా అతడు అత్యంత ప్రతిష్ఠాత్మకమైన 9 పారా స్పెషల్ ఫోర్స్కు చెందిన కమాండో అయి ఉండొచ్చని సోషల్ మీడియాలో ఊహాగానాలు వ్యక్తమవుతున్నాయి. ‘మౌంటెన్ ర్యాట్స్’, ‘పైరేట్స్’, ‘ఘోస్ట్ ఆపరేటర్స్’ వంటి పేర్లతో కూడా ఈ దళం ప్రసిద్ధి చెందింది. జమ్మూకశ్మీర్లో రాష్ట్రీయ రైఫిల్స్తో కలిసి ఉగ్రవాద వ్యతిరేక కార్యకలాపాల్లో ఈ దళం కీలక పాత్ర పోషిస్తోంది.
1965 భారత్-పాక్ యుద్ధ సమయంలో శత్రు భూభాగంలోకి చొచ్చుకెళ్లి ప్రత్యేక ఆపరేషన్లు నిర్వహించేందుకు కల్నల్ మేఘ్ సింగ్ ఓ ప్రత్యేక దళాన్ని ఏర్పాటు చేశారు. తొలుత ‘మేఘ్దూత్ ఫోర్స్’గా పిలిచిన ఈ యూనిట్ హాజీ పీర్ బల్జ్ ప్రాంతంలో నిర్వహించిన ఆపరేషన్లతో గుర్తింపు పొందింది. అనంతరం 1966 జులై 1న 9వ పారాచూట్ కమాండో బెటాలియన్గా ఏర్పాటైంది. ఉధంపూర్ కేంద్రంగా పనిచేసే ఈ దళం పర్వత యుద్ధ తంత్రంలో నైపుణ్యం కలిగి ఉంది. ‘మినిమం మెన్.. మ్యాక్సిమమ్ ఇంపాక్ట్’ అనేది దీని నినాదం. 1971 యుద్ధంలో ఆపరేషన్ మంధోల్, శ్రీలంకలో శాంతి పరిరక్షక కార్యకలాపాలు, కార్గిల్ యుద్ధం, 2001లో ఆపరేషన్ అపాచీ, 2016 సర్జికల్ స్ట్రైక్స్ వంటి కీలక సైనిక చర్యల్లో ఈ దళం పాల్గొన్నట్లు చరిత్ర చెబుతోంది.














కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!