అన్నమయ్య జిల్లాలో ఆర్టీసీ బస్సు బోల్తా.. టైర్ పంక్చర్‌తో ప్రమాదం!

అన్నమయ్య జిల్లాలో మంగళవారం ఉదయం ప్రయాణికులతో వెళ్తున్న ఆర్టీసీ నాన్‌స్టాప్ బస్సు ప్రమాదానికి గురైంది. మదనపల్లె ఆర్టీసీ డిపోకు చెందిన ఈ బస్సు తిరుపతికి వెళ్తుండగా, వాల్మీకిపురం మండలం విఠలం సమీపంలోని మదనపల్లె-తిరుపతి హైవేపై ప్రమాదం చోటుచేసుకుంది. అకస్మాత్తుగా బస్సు టైర్ పంక్చర్ కావడంతో డ్రైవర్ నియంత్రణ కోల్పోయినట్లు సమాచారం. దీంతో బస్సు రోడ్డు పక్కనే ఉన్న కల్వర్టులోకి దూసుకెళ్లి బోల్తాపడింది.

ప్రమాదంలో సుమారు 20 మంది ప్రయాణికులు తీవ్రంగా గాయపడినట్లు తెలుస్తోంది. ఘటన సమాచారం అందుకున్న వెంటనే పోలీసులు, స్థానికులు అక్కడికి చేరుకుని సహాయక చర్యలు చేపట్టారు. క్షతగాత్రులను మొదట వాల్మీకిపురం ప్రభుత్వ ఆస్పత్రికి తరలించి చికిత్స అందించారు. పరిస్థితి విషమంగా ఉన్న కొందరిని మెరుగైన వైద్యం కోసం మదనపల్లె ప్రభుత్వ జిల్లా ఆస్పత్రికి తరలించారు. ఈ ఘటనపై ఎస్సై తిప్పేస్వామి కేసు నమోదు చేసి దర్యాప్తు కొనసాగిస్తున్నారు.