రైలు ప్రయాణంలో బీజేపీ ఎంపీ తేజస్వి సూర్య భార్యకు చేదు అనుభవం

బీజేపీ ఎంపీ తేజస్వి సూర్య భార్య, కర్ణాటక సంగీత గాయని శివశ్రీ స్కందప్రసాద్‌ తనకు ఎదురైన రైలు ప్రయాణ అనుభవాన్ని సోషల్‌ మీడియాలో వెల్లడించారు. దాదాపు ఐదు గంటల ప్రయాణంలో నాలుగు గంటల పాటు మానసికంగా ఇబ్బంది పడ్డానని ఆమె తెలిపారు. 56 సీట్ల కోచ్‌లో సుమారు 40 మంది ప్రయాణికులు పెద్దగా మాట్లాడుకుంటూ, నవ్వుతూ గందరగోళం సృష్టించారని ఆమె ఆరోపించారు.

వేరే బోగీలో కూర్చునేందుకు అవకాశం కల్పించాలని టీటీఈని కోరినా, రైలు పూర్తిగా నిండిపోవడంతో సీట్లు అందుబాటులో లేకపోయాయని శివశ్రీ తెలిపారు. దీంతో అదే కోచ్‌లో ఉండాల్సి వచ్చిందన్నారు. కొందరు యువతులను ఉద్దేశించి పరోక్ష వ్యాఖ్యలు చేశారని, కొందరు ప్రయాణికులు ఉనో ఆట ఆడటంతో ఇబ్బంది మరింత పెరిగిందని ఆమె పేర్కొన్నారు. కళాకారులుగా ప్రయాణాల్లో ఎదురయ్యే ఇలాంటి అనుభవాలు మానసిక ఒత్తిడిని మరింత పెంచుతాయని సోషల్‌ మీడియా పోస్టులో వెల్లడించారు.