స్మిత్ మచ్చర్‌ ధైర్యానికి చిరంజీవి ప్రశంసలు

ఇటీవల జరిగిన ఫ్లైదుబాయ్‌ విమాన ఘటనపై మెగాస్టార్‌ చిరంజీవి స్పందించారు. ప్రాణాలకు ముప్పు ఉన్నప్పటికీ ప్రయాణికుల భద్రత కోసం ధైర్యంగా వ్యవహరించిన భారత కెప్టెన్‌ స్మిత్‌ మచ్చర్‌ను ఆయన ప్రశంసించారు. దుబాయ్‌ నుంచి టెల్‌ అవీవ్‌కు వెళ్తున్న విమానంలో సహ పైలట్‌ దాడిలో స్మిత్‌ తీవ్రంగా గాయపడినప్పటికీ, కాక్‌పిట్‌ తలుపు తెరిచి ఇతరులు లోపలికి వెళ్లేందుకు అవకాశం కల్పించారు. సంక్షోభ సమయంలో తాను హనుమాన్‌ చాలీసా పఠిస్తూ ధైర్యాన్ని కూడగట్టుకున్నానని స్మిత్‌ ప్రధాని నరేంద్ర మోదీతో సంభాషణలో వెల్లడించారు. ఈ విషయం తనను ఎంతగానో కదిలించిందని చిరంజీవి పేర్కొన్నారు.

స్మిత్‌ మచ్చర్‌ త్వరగా, పూర్తిగా కోలుకోవాలని చిరంజీవి ఆకాంక్షించారు. గాయపడిన పరిస్థితుల్లోనూ ఇతరుల ప్రాణాలను కాపాడేందుకు ఆయన చూపిన ధైర్యం అభినందనీయమని పేర్కొన్నారు. పలువురు సినీ ప్రముఖులు కూడా స్మిత్‌ ధైర్యసాహసాలను ప్రశంసించారు. భవిష్యత్తులో స్మిత్‌ నడిపే విమానంలో ప్రయాణించే అవకాశం రావాలని సల్మాన్‌ ఖాన్‌ ఆకాంక్షించగా, విజయ్‌ దేవరకొండ, ఆర్‌. మాధవన్‌ తదితరులు కూడా ఆయన ధైర్యాన్ని కొనియాడారు.