ప్రజాసేవే లక్ష్యంగా పనిచేయండి.. డీఎస్పీలకు సీఎం రేవంత్‌ సూచన

తెలంగాణ అభివృద్ధిలో పోలీసు అధికారుల పాత్ర కీలకమని, విధ్వంసమైన రాష్ట్రాన్ని వికాసం వైపు నడిపించడంలో వారు భాగస్వాములు కావాలని ముఖ్యమంత్రి రేవంత్‌రెడ్డి అన్నారు. శిక్షణ పూర్తి చేసుకుని ఇటీవల పోలీస్‌ శాఖలో చేరిన డీఎస్పీలను ఉద్దేశించి మంగళవారం ఎంసీఆర్‌హెచ్‌ఆర్‌డీలో ఆయన ప్రసంగించారు. గత ప్రభుత్వ హయాంలో నియామకాల్లో జరిగిన జాప్యం, గందరగోళాన్ని ప్రస్తావిస్తూ.. తమ ప్రభుత్వం టీజీపీఎస్సీని ప్రక్షాళన చేసి యూపీఎస్సీ తరహాలో పారదర్శక నియామక వ్యవస్థను రూపొందించిందని తెలిపారు. డీఎస్పీల నియామకాల విషయంలోనూ ప్రభుత్వం న్యాయపోరాటం చేసిందని, సుప్రీంకోర్టులో బలమైన వాదనలు వినిపించి అనుకూల తీర్పు సాధించిందని పేర్కొన్నారు. గ్రామీణ, పేద కుటుంబాలకు చెందిన యువత కూడా ప్రభుత్వ ఉద్యోగాలు సాధించడం నియామకాల్లో పారదర్శకతకు నిదర్శనమని చెప్పారు. పోలీసు అధికారులు తమ నేపథ్యాన్ని మర్చిపోకుండా, ప్రజాసేవకు ప్రాధాన్యమిస్తూ ఉన్నత పదవులకు ఎదగాలని సూచించారు.

డీఎస్పీలు తమ అధికారాలను వ్యక్తిగత ప్రయోజనాల కోసం కాకుండా ప్రజల సంక్షేమం, శాంతిభద్రతల పరిరక్షణ కోసం వినియోగించాలని సీఎం సూచించారు. బాధితుల సమస్యలను ఓపికగా విని, వారితో కొంత సమయం మాట్లాడితే సగం సమస్య పరిష్కారమైనట్లేనని అన్నారు. ట్రాఫిక్‌ సమస్యలు, ఆహార కల్తీ, డ్రగ్స్‌, సైబర్‌ నేరాలు రాష్ట్రానికి ప్రధాన సవాళ్లుగా మారాయని పేర్కొన్నారు. డ్రగ్స్‌ కేసుల్లో శిక్షల శాతం తక్కువగా ఉండటానికి ఫోరెన్సిక్‌ నిపుణుల కొరత కూడా కారణమని వివరించారు. పోలీసు అధికారులు తమ శారీరక సామర్థ్యాన్ని పెంపొందించుకోవడంతో పాటు నైపుణ్యాలను మెరుగుపరుచుకోవాలని, అవసరమైతే విదేశాల్లో శిక్షణ, అధ్యయన అవకాశాలు కల్పిస్తామని హామీ ఇచ్చారు. ఈ సందర్భంగా శిక్షణలో ప్రతిభ కనబరిచిన ప్రొబేషనరీ అధికారులకు పురస్కారాలు అందజేసి, క్రైమ్‌ సీన్‌ ఫోరెన్సిక్స్‌ హ్యాండ్‌బుక్‌ను ఆవిష్కరించారు.