ట్రంప్ ప్రకటనతో దిగొచ్చిన చమురు ధరలు..

అంతర్జాతీయ మార్కెట్లో ముడి చమురు ధరలు క్రమంగా తగ్గుముఖం పడుతున్నాయి. ఇరాన్‌పై మరిన్ని సైనిక దాడులు అవసరం లేకపోవచ్చని అమెరికా అధ్యక్షుడు డొనాల్డ్ ట్రంప్ చేసిన ప్రకటనతో చమురు ధరలు భారీగా పడిపోయాయి. దీంతో బ్రెంట్ క్రూడ్ ధర బ్యారెల్‌కు 90 డాలర్ల దిగువకు చేరి మూడు నెలల కనిష్ఠ స్థాయిని తాకింది. పశ్చిమాసియాలో ఉద్రిక్తతలు తగ్గుముఖం పట్టవచ్చనే అంచనాలతో చమురు ఫ్యూచర్స్ మార్కెట్లో ట్రేడర్లు అమ్మకాలకు మొగ్గుచూపారు. మంగళవారం ట్రేడింగ్‌లో బ్రెంట్ క్రూడ్ ధర 3.3 శాతం తగ్గగా, అమెరికా వెస్ట్ టెక్సాస్ ఇంటర్మీడియట్ (WTI) క్రూడ్ ధర 2.6 శాతం పడిపోయి బ్యారెల్‌కు 84.10 డాలర్ల వద్ద ట్రేడైంది.

వైట్‌హౌస్‌లో జరిగిన సమావేశంలో ట్రంప్ మాట్లాడుతూ.. ఇరాన్ సైనిక సామర్థ్యం పూర్తిగా దెబ్బతిన్నందున ప్రస్తుత పరిస్థితిని కొనసాగించాలనుకుంటున్నామని, ఇకపై ఆ దేశంపై దాడులు చేయాల్సిన అవసరం లేకపోవచ్చని పేర్కొన్నారు. అయితే ఇరాన్ అణు కార్యకలాపాలను కొనసాగించకుండా ఆ దేశంతో దీర్ఘకాలిక ఒప్పందం కుదుర్చుకోవాలని అమెరికా భావిస్తోందని తెలిపారు. పరిస్థితుల్లో మార్పులు వస్తే ఎదుర్కొనేందుకు అమెరికా సిద్ధంగా ఉందని స్పష్టం చేశారు. ఇరాన్ అణు కార్యక్రమంపై ఒప్పందం కుదరడంతో పాటు హర్మూజ్ జలసంధి తిరిగి తెరుచుకుంటే పశ్చిమాసియాలో ఉద్రిక్తతలు మరింత తగ్గే అవకాశముందని అంచనాలు వ్యక్తమవుతున్నాయి.