

బీఎస్-6 వాహనదారులకు కేంద్ర ప్రభుత్వం ఊరట కల్పించింది. వాహనాల పొల్యూషన్ అండర్ కంట్రోల్ (PUC) సర్టిఫికెట్ వ్యాలిడిటీ నిబంధనల్లో కీలక మార్పులు చేసింది. కేంద్ర రోడ్డు రవాణా, రహదారుల మంత్రిత్వ శాఖ సెంట్రల్ మోటార్ వెహికల్స్ (16వ సవరణ) నిబంధనలు–2026 ద్వారా ఈ మార్పులను తీసుకొచ్చింది. కొత్త మార్గదర్శకాల ప్రకారం.. ఆరేళ్లలోపు ఉన్న బీఎస్-6 ప్రైవేట్ వాహనాలకు పీయూసీ సర్టిఫికెట్ గడువు మూడేళ్లుగా నిర్ణయించారు. అదే వయసున్న వాణిజ్య వాహనాలకు రెండేళ్ల వ్యాలిడిటీ కల్పించారు. ఆరేళ్లకు పైబడి పదేళ్లలోపు ఉన్న బీఎస్-6 వాహనాలకు ఏడాది, పదేళ్లు దాటిన వాహనాలకు ఆరు నెలల గడువు ఉంటుంది.
ఇక బీఎస్-1, బీఎస్-2, బీఎస్-3 వాహనాలకు మూడు నెలలు, బీఎస్-4 వాహనాలకు ఆరు నెలల పీయూసీ వ్యాలిడిటీ వర్తిస్తుంది. వాహనం వయసును మొదటి రిజిస్ట్రేషన్ తేదీ ఆధారంగా లెక్కిస్తారు. కొత్త నిబంధనలు అమల్లోకి రాకముందు జారీ చేసిన సర్టిఫికెట్లకు తదుపరి రెన్యూవల్ సమయంలోనే కొత్త గడువు వర్తిస్తుంది. పాత సర్టిఫికెట్ గడువు ముగియడానికి పది రోజుల ముందు రెన్యూవల్కు దరఖాస్తు చేస్తే, కొత్త సర్టిఫికెట్ గడువు పాతది ముగిసిన తేదీ నుంచి ప్రారంభమవుతుంది. గడువు ముగిసిన తర్వాత రెన్యూవల్ చేసుకుంటే, దరఖాస్తు చేసిన తేదీ నుంచే కొత్త వ్యాలిడిటీ లెక్కిస్తారు.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!