అర్హులైన ఓటర్ల నమోదు కోసం ఎన్నికల సంఘం ప్రత్యేక డ్రైవ్‌

దేశవ్యాప్తంగా ఓటరు జాబితాల ప్రత్యేక సమగ్ర సవరణ (ఎస్‌ఐఆర్‌) ప్రక్రియ పూర్తయిన 20 రాష్ట్రాలు, కేంద్రపాలిత ప్రాంతాల్లో ప్రత్యేక ఓటర్ల నమోదు కార్యక్రమం చేపట్టాలని కేంద్ర ఎన్నికల సంఘం ఆదేశించింది. బిహార్‌, పశ్చిమ బెంగాల్‌ సహా ఆయా ప్రాంతాల్లో ఓటరు జాబితాల నుంచి పేర్లు గల్లంతైన అర్హులైన ఓటర్లతో పాటు యువత, తొలిసారి ఓటు హక్కు పొందేవారిని నమోదు చేయడంపై అధికారులు దృష్టి సారించనున్నారు. సవరణకు ముందు ఉన్న ఓటరు జాబితాను ప్రస్తుత జాబితాతో పోల్చి, అందులో లేని అర్హులైన ఓటర్లను గుర్తించాలని ఎన్నికల అధికారులకు సూచించింది. అర్హులు తమ పేర్ల నమోదుకు ఫారం-6 సమర్పించేలా సహకరించాలని ఆదేశించింది.

ఎస్‌ఐఆర్‌ ప్రక్రియలో భాగంగా ముసాయిదా ఓటరు జాబితాల నుంచి సుమారు 13 కోట్ల పేర్లు తొలగించారనే అంశంపై ఆందోళనలు వ్యక్తమవుతున్నాయి. అర్హులైన ఓటర్ల పేర్లను తొలగించారని విపక్షాలు ఆరోపించగా, ఎన్నికల సంఘం మాత్రం నిబంధనల ప్రకారమే ఈ ప్రక్రియ చేపట్టినట్లు పేర్కొంది. ఈ నేపథ్యంలో జిల్లా ఎన్నికల అధికారులు, బూత్‌ స్థాయి అధికారులు ప్రత్యేక నమోదు కార్యక్రమాన్ని పర్యవేక్షించాలని, అర్హులైన ఓటర్లకు దరఖాస్తు ప్రక్రియలో సహకరించాలని ఆదేశించింది. అయితే, ముసాయిదా జాబితాల నుంచి తొలగించిన 13 కోట్ల పేర్లన్నీ అర్హులైన ఓటర్లవేనని లేదా వారందరి పేర్లను తప్పుగా తొలగించారని ఈ సంఖ్య సూచించదు.