గ్రీన్ కార్డు దరఖాస్తుదారులకు బిగ్ అలర్ట్...

అమెరికాలో గ్రీన్ కార్డు, శాశ్వత నివాసం కోరుకునే కొందరు దరఖాస్తుదారులకు మరో పరీక్ష ఎదురుకానుంది. ట్రంప్ ప్రభుత్వం ‘పబ్లిక్ ఛార్జ్’ నిర్వచనాన్ని విస్తరిస్తూ కొత్త నిబంధనలను తీసుకొస్తోంది. దీంతో దరఖాస్తుదారుడు భవిష్యత్తులో ప్రభుత్వంపై ఆర్థికంగా ఆధారపడే అవకాశం ఉందా అనే అంశాన్ని యూఎస్‌సీఐఎస్ అధికారులు మరింత విస్తృతంగా పరిశీలించే అవకాశం ఉంటుంది. ప్రభుత్వ ప్రయోజనాల వినియోగంతో పాటు ఇతర సంబంధిత పరిస్థితులను కూడా సమగ్రంగా పరిగణనలోకి తీసుకునేందుకు ఈ నిబంధన వీలు కల్పిస్తుంది.

కొత్త విధానం ప్రకారం దరఖాస్తుదారుల వయసు, ఆరోగ్యం, కుటుంబ స్థితి, ఆస్తులు, ఆర్థిక పరిస్థితి, విద్య, నైపుణ్యాలు, ప్రభుత్వ ప్రయోజనాల వినియోగం వంటి అంశాలను అధికారులు పరిశీలించవచ్చు. శాశ్వత నివాస హోదా మార్పు కోసం దాఖలు చేసే కొన్ని ఫారమ్ I-485 దరఖాస్తులకు ఈ నిబంధనలు 2026 సెప్టెంబర్ 18 నుంచి వర్తించనున్నాయి. అయితే శరణార్థులు, ఆశ్రయం పొందినవారు, కొన్ని ప్రత్యేక మానవతా, ప్రత్యేక వలస వర్గాలకు మినహాయింపులు కొనసాగనున్నాయి.