కుంటాలలో హార్వెస్టర్ బీభత్సం.. ముగ్గురికి గాయాలు

నిర్మల్ జిల్లా కుంటాల మండల కేంద్రంలో ఆదివారం వారసంత సందర్భంగా హార్వెస్టర్ అదుపుతప్పి బీభత్సం సృష్టించింది. అంబకంటి నుంచి కుంటాల మీదుగా లోకేశ్వరం వైపు వెళ్తున్న హార్వెస్టర్ జనసందోహం ఎక్కువగా ఉన్న సంతలోకి ప్రవేశించింది. ఈ సమయంలో డ్రైవర్‌కు అకస్మాత్తుగా కళ్లు తిరిగి మూర్ఛ రావడంతో వాహనంపై నియంత్రణ కోల్పోయినట్లు సమాచారం. దీంతో హార్వెస్టర్ మొదట అక్కడ ఉన్న బైకులను ఢీకొట్టింది.

అనంతరం కుంటాల మండల కేంద్రానికి చెందిన ఓ మహిళతో పాటు అంబకంటికి చెందిన ఇద్దరు వ్యక్తులు గాయపడ్డారు. వీరిలో ఒకరికి తలకు తీవ్ర గాయాలు కాగా, మరో ఇద్దరికి చేతులు, కాళ్లకు గాయాలయ్యాయి. క్షతగాత్రులను చికిత్స నిమిత్తం ఆస్పత్రులకు తరలించారు. వారసంత కారణంగా పెద్ద సంఖ్యలో ప్రజలు అక్కడ ఉన్నప్పటికీ, మొదట బైకులను ఢీకొట్టడంతో పెను ప్రమాదం తప్పినట్లు స్థానికులు భావిస్తున్నారు. హార్వెస్టర్ డ్రైవర్ బిరేల్లి గ్రామానికి చెందిన వ్యక్తిగా గుర్తించినట్లు సమాచారం. పోలీసులు అతడిని అదుపులోకి తీసుకుని ఘటనపై దర్యాప్తు చేస్తున్నారు.