హెల్మెట్‌ భద్రతకే కాదు.. పరిశుభ్రతకూ ప్రాధాన్యం ఇవ్వాలి, ఈ జాగ్రత్తలు తప్పనిసరి!

ద్విచక్ర వాహనదారుల భద్రతకు హెల్మెట్‌ ఎంతో కీలకం. అయితే దాన్ని ధరించడం ఎంత ముఖ్యమో.. పరిశుభ్రంగా ఉంచుకోవడం కూడా అంతే అవసరం. తలకు పట్టే చెమట, చర్మంలోని నూనె, దుమ్ము, హెయిర్‌ ప్రొడక్ట్‌ల అవశేషాలు క్రమంగా హెల్మెట్‌ లోపలి ప్యాడింగ్‌లో పేరుకుపోతాయి. లోపల గాలి ప్రసరణ పరిమితంగా ఉండటంతో తేమ ఎక్కువసేపు ఉండిపోవచ్చు. ముఖ్యంగా వేసవి, వర్షాకాలాల్లో దుర్వాసనతో పాటు తలచర్మంపై దురద, అసౌకర్యం వంటి సమస్యలు ఎదురయ్యే అవకాశం ఉంటుంది. దుర్వాసన వచ్చినప్పుడు పెర్‌ఫ్యూమ్‌, డియోడరెంట్‌ స్ప్రే చేయడం తాత్కాలికంగా వాసనను తగ్గించినా, అసలు సమస్యను పరిష్కరించదు.

ప్రస్తుతం చాలా హెల్మెట్లలో లోపలి లైనర్‌, చీక్‌ ప్యాడ్లను తొలగించి శుభ్రం చేసే సౌకర్యం ఉంది. తయారీదారు సూచనల ప్రకారం మృదువైన సబ్బు లేదా తేలికపాటి క్లీనింగ్‌ ద్రావణంతో వాటిని శుభ్రం చేసి, గాలి బాగా తగిలే నీడ ఉన్న ప్రదేశంలో పూర్తిగా ఆరబెట్టాలి. తొలగించలేని ప్యాడింగ్‌ ఉన్న హెల్మెట్లను నీటిలో పూర్తిగా ముంచకుండా, కొద్దిగా తడిచిన మృదువైన వస్త్రంతో లోపలి భాగాన్ని తుడిచి ఆరబెట్టాలి. ప్రయాణం తర్వాత హెల్మెట్‌ను వెంటనే మూసిన బ్యాగులో పెట్టకుండా గాలి తగిలేలా ఉంచడం, తడి జుట్టుతో ధరించకుండా ఉండటం, ఇతరులతో హెల్మెట్‌ పంచుకోకుండా జాగ్రత్తపడటం మంచిది. ఉతికే వీలున్న బ్రీతబుల్‌ స్కల్‌క్యాప్‌ ఉపయోగించడం వల్ల చెమట నేరుగా ప్యాడింగ్‌కు చేరకుండా కొంతవరకు నిరోధించవచ్చు.