దసరా వేళ బోనుల్లో పాలపిట్టలు.. నాలుగింటిని కాపాడిన పోలీసులు

దసరా సందర్భంగా తెలంగాణ రాష్ట్ర పక్షి పాలపిట్టలను కొందరు స్వార్థ ప్రయోజనాల కోసం బోనుల్లో బంధించారని హైదరాబాద్ పోలీస్ కమిషనర్ వీసీ సజ్జనర్ తెలిపారు. పౌరుల నుంచి అందిన సమాచారంతో నగరంలోని పలు ప్రాంతాల్లో పోలీసులు తనిఖీలు నిర్వహించి, నాలుగు పాలపిట్టలను సజీవంగా రక్షించినట్లు ఆయన వెల్లడించారు. ఈ వివరాలను సజ్జనర్ ఎక్స్‌లో పోస్టు చేశారు. లంగర్‌హౌస్‌లోని బాపుఘాట్ సమీప ఆలయం వద్ద రెండు పాలపిట్టలను, ఛత్రినాకలోని శ్రీ చిత్రగుప్త స్వామి ఆలయం వద్ద ఒక పక్షిని, మంగళ్‌హాట్‌లోని బాలాజీనగర్ ఆలయం సమీపంలో మరో పాలపిట్టను పోలీసులు కాపాడారు.

రక్షించిన పక్షులను అటవీశాఖ అధికారులకు అప్పగించినట్లు సజ్జనర్ తెలిపారు. పాలపిట్టలను బోనుల్లో బంధించి హింసించడం అమానవీయమని, పండుగల పేరుతో మూగజీవాల స్వేచ్ఛను హరించవద్దని ఆయన కోరారు. ఈ ఘటనలకు బాధ్యులైన వారిపై అటవీశాఖ సమన్వయంతో కఠిన చట్టపరమైన చర్యలు తీసుకుంటామని స్పష్టం చేశారు. వన్యప్రాణులకు హాని జరిగినట్లు గుర్తిస్తే 1800 425 5364, 9803338666 లేదా డయల్ 112కు సమాచారం అందించాలని ప్రజలకు విజ్ఞప్తి చేశారు.