హైదరాబాద్‌ అమెరికన్ కాన్సులేట్ రోడ్డుకు ‘డొనాల్డ్ ట్రంప్ అవెన్యూ’ గా పేరు

హైదరాబాద్‌లోని అమెరికన్ కాన్సులేట్‌కు వెళ్లే ప్రధాన రహదారికి ‘డొనాల్డ్ ట్రంప్ అవెన్యూ’గా నామకరణం చేయడానికి తెలంగాణ ప్రభుత్వం సిద్ధమైంది. జూన్ 23న ఈ రహదారిని తెలంగాణ ముఖ్యమంత్రి రేవంత్‌రెడ్డి అధికారికంగా ప్రారంభించనున్నట్లు సమాచారం. అమెరికా స్వాతంత్య్ర దినోత్సవ వేడుకలకు ముందుగా ఈ కార్యక్రమాన్ని నిర్వహించనున్నారు.

తెలంగాణ-అమెరికా మధ్య వాణిజ్య, పెట్టుబడులు, సాంకేతిక రంగాల్లో పెరుగుతున్న సంబంధాలకు గుర్తింపుగా ఈ నిర్ణయం తీసుకున్నట్లు తెలుస్తోంది. ప్రపంచ స్థాయి ఐటీ కేంద్రంగా హైదరాబాద్ అభివృద్ధిలో కీలక పాత్ర పోషించిన అంతర్జాతీయ సంస్థలను గౌరవించే క్రమంలో ప్రభుత్వం ఈ చర్య చేపట్టింది. భవిష్యత్తులో గూగుల్, మైక్రోసాఫ్ట్ వంటి ప్రపంచ ప్రఖ్యాత సంస్థల పేర్లతో కూడా రహదారులకు నామకరణం చేసే అవకాశాలను పరిశీలిస్తున్నట్లు సమాచారం.