అల్వాల్‌లో హైడ్రా యాక్షన్..

అల్వాల్‌లోని సర్వే నంబర్ 1 పరిధిలో ఉన్న 108 ఎకరాల ప్రభుత్వ భూమిని పరిరక్షించేందుకు హైడ్రా అధికారులు భారీ కూల్చివేత కార్యక్రమాన్ని చేపట్టారు. ప్రభుత్వ భూములను ఆక్రమించి నిర్మించిన అక్రమ కట్టడాలను తొలగించే చర్యలు ఉదయం నుంచే ప్రారంభమయ్యాయి. ఈ ఆపరేషన్‌కు భారీ సంఖ్యలో పోలీసు బలగాలు, డిజాస్టర్ రెస్పాన్స్ ఫోర్స్ (DRF) సిబ్బందిని మోహరించారు.

కూల్చివేతల సమయంలో ఎలాంటి అవాంఛనీయ ఘటనలు చోటుచేసుకోకుండా అధికారులు కట్టుదిట్టమైన భద్రతా ఏర్పాట్లు చేశారు. ప్రభుత్వ భూముల పరిరక్షణలో భాగంగా అక్రమ ఆక్రమణలపై నిరంతర చర్యలు కొనసాగుతాయని అధికారులు తెలిపారు. ఈ చర్యలతో ప్రభుత్వ ఆస్తుల రక్షణకు ప్రాధాన్యం ఇస్తున్నట్లు స్పష్టం చేశారు.