ఉక్రెయిన్‌లో భారత ఫార్మా ప్లాంట్‌పై డ్రోన్ దాడి

ఉక్రెయిన్‌లోని సుమీ ప్రాంతంలో భారత కుసుమ్‌ గ్రూప్ నిర్వహిస్తున్న ఫార్మా ప్లాంట్‌పై రష్యా డ్రోన్ దాడి జరిగింది. ఈ ఘటనలో ఒకరు మృతి చెందగా, పలువురు గాయపడ్డారు. ప్లాంట్‌ ప్రధాన నిర్మాణం భారీగా దెబ్బతిన్నట్లు ఉక్రెయిన్‌ అధికారులు తెలిపారు. సహాయక చర్యలు, నష్టాన్ని అంచనా వేసే ప్రక్రియ కొనసాగుతున్న నేపథ్యంలో మృతులు, క్షతగాత్రుల సంఖ్యలో మార్పు ఉండొచ్చని అధికారులు పేర్కొన్నారు. ప్లాంట్‌కు సుమారు రూ.400 కోట్ల నష్టం వాటిల్లినట్లు నివేదికలు పేర్కొంటున్నాయి.

భారతీయుడు రాజీవ్‌ గుప్తా నేతృత్వంలోని కుసుమ్‌ గ్రూప్‌ 2009లో సుమీలో ఈ ప్లాంట్‌ను ఏర్పాటు చేసింది. పలు దేశాలకు జనరిక్‌ ఔషధాలను సంస్థ సరఫరా చేస్తోంది. ఈ దాడిని ఉక్రెయిన్‌ అధ్యక్షుడు వొలొదిమిర్‌ జెలెన్‌స్కీ ఖండించారు. ఈ ఫార్మా కేంద్రం సైనిక స్థావరం కాదని, అవసరమైన ఔషధాల తయారీలో కీలక పాత్ర పోషిస్తోందని ఆయన పేర్కొన్నారు.