ఇటలీలో విదేశీ విద్యార్థుల సంఖ్యకు పరిమితులు...

ఇటలీ పాఠశాలల్లో విదేశీ విద్యార్థుల సంఖ్యకు పరిమితి విధించడంతో పాటు బుర్ఖా, నిఖాబ్‌ వంటి ముఖాన్ని పూర్తిగా కప్పే వస్త్రాలపై నిషేధం విధించేందుకు ప్రభుత్వం సిద్ధమవుతోంది. ఈ మేరకు త్వరలో మంత్రివర్గ సమావేశంలో ప్రతిపాదనను ప్రవేశపెట్టనున్నట్లు ప్రధాని జార్జియా మెలోని తెలిపారు. విదేశీ విద్యార్థులు అధికంగా ఉన్న తరగతుల్లో ఇటాలియన్‌ భాషను అర్థం చేసుకోవడంలో ఇబ్బందులు తలెత్తుతున్నాయని, ఇది విద్యార్థుల ఏకీకరణపై ప్రభావం చూపుతోందని ఆమె పేర్కొన్నారు. అయితే ఒక్కో తరగతిలో గరిష్ఠంగా ఎంతమంది విదేశీ విద్యార్థులను అనుమతించాలనే విషయాన్ని మెలోని వెల్లడించలేదు.

ఇటాలియన్‌ భాష అర్థం కాని విద్యార్థులు ఉపాధ్యాయులు, తోటి విద్యార్థుల సహకారంతో త్వరగా భాషను నేర్చుకుని విద్యా వ్యవస్థలో కలిసిపోవాలని మెలోని సూచించారు. అలాగే ఇటాలియన్‌ పాఠశాల వ్యవస్థలో తమ పిల్లల ఏకీకరణకు ఇబ్బందులు ఎదురవుతున్న విదేశీ తల్లిదండ్రులు ఇటాలియన్‌ భాష నేర్చుకోవాల్సి ఉంటుందని ప్రభుత్వం ప్రతిపాదిస్తోంది. ఈ కొత్త నిబంధనలు అమల్లోకి రావాలంటే ముందుగా మంత్రివర్గ ఆమోదం, అనంతరం పార్లమెంట్‌ ఆమోదం అవసరం.