జేఈఈ అడ్వాన్స్‌డ్‌-2027 తేదీ ఖరారు

2027-28 విద్యా సంవత్సరంలో దేశవ్యాప్తంగా ఉన్న 23 ఐఐటీల్లో బీటెక్‌ సీట్ల భర్తీకి నిర్వహించనున్న జేఈఈ అడ్వాన్స్‌డ్‌-2027ను మే 16న నిర్వహించేలా ప్రాథమికంగా నిర్ణయించినట్లు ఐఐటీ వర్గాల ద్వారా తెలిసింది. ఈసారి పరీక్ష నిర్వహణ బాధ్యతలను ఐఐటీ దిల్లీ చేపట్టనుంది. జేఈఈ మెయిన్‌ తొలి విడతను జనవరి 22 నుంచి నిర్వహించనున్నట్లు జాతీయ పరీక్షల సంస్థ (ఎన్‌టీఏ) ఇప్పటికే ప్రకటించింది. తుది విడత పరీక్షలను ఏప్రిల్‌ తొలి వారంలో నిర్వహించే అవకాశం ఉంది. ఈ నేపథ్యంలో మే 16న జేఈఈ అడ్వాన్స్‌డ్‌ నిర్వహించే అంశంపై ఐఐటీ వర్గాల్లో ప్రాథమిక నిర్ణయం జరిగినట్లు సమాచారం.

ఇదిలా ఉండగా, ఐఐటీలకు సంబంధించిన కీలక నిర్ణయాలు తీసుకునే ఐఐటీ కౌన్సిల్‌ సమావేశం తేదీపై ఇప్పటివరకు స్పష్టత రాలేదు. కేంద్ర విద్యాశాఖ మంత్రి నేతృత్వంలో జరిగే ఈ సమావేశంలో ఐఐటీల ఛైర్మన్లు, డైరెక్టర్లు, కేంద్ర విద్యాశాఖ, ఏఐసీటీఈ, యూజీసీ అధికారులు పాల్గొంటారు. కేంద్ర విద్యాశాఖలో ఇటీవల చోటుచేసుకున్న మార్పుల నేపథ్యంలో ఈసారి కౌన్సిల్‌ సమావేశం ఎప్పుడు జరుగుతుందనే దానిపై అనిశ్చితి నెలకొంది. ప్రస్తుతం ఇంటర్‌ ఉత్తీర్ణులైన విద్యార్థులు ఆ తర్వాతి ఏడాదితో కలిపి వరుసగా రెండుసార్లు మాత్రమే జేఈఈ అడ్వాన్స్‌డ్‌ రాసేందుకు అర్హులు. ఈ అవకాశాన్ని మూడుసార్లకు పెంచాలని విద్యార్థులు కోరుతున్నారు. దీనిపై నిర్ణయం తీసుకోవాలంటే ఐఐటీ కౌన్సిల్‌ సమావేశంలో చర్చ అవసరమని నిపుణులు చెబుతున్నారు.