బాబా రాందేవ్ వ్యాఖ్యలపై కంగనా రనౌత్ కౌంటర్..

జెన్‌ జెడ్‌పై కంగనా రనౌత్ చేసిన వివాదాస్పద ‘జెనరేషన్ గట్టర్’ వ్యాఖ్యలపై బాబా రాందేవ్ స్పందించినట్లు వచ్చిన వార్తల నేపథ్యంలో ఆమె ఘాటుగా స్పందించారు. ఇన్‌స్టాగ్రామ్ వేదికగా కంగనా రనౌత్ తన యవ్వనం, వ్యక్తిగత జీవితంపై వ్యాఖ్యలు చేయడాన్ని తప్పుబట్టారు. తన వ్యక్తిగత విషయాల గురించి ‘పగటి కలలు’ కనొద్దంటూ రాందేవ్‌కు కౌంటర్ ఇచ్చారు. తన క్యారెక్టర్‌పై పాఠాలు చెప్పే హక్కు ఆయనకు లేదని స్పష్టం చేశారు.

అంతేకాకుండా, రాందేవ్‌తో అనుబంధం ఉన్న కొన్ని ఉత్పత్తుల వైద్యపరమైన ప్రభావాలకు సంబంధించిన గత న్యాయ వివాదాలను ప్రస్తావిస్తూ కంగనా విమర్శలు చేశారు. అలాంటి ఆరోపణల విషయంలో సుప్రీంకోర్టు నుంచి తనకు ఎలాంటి విమర్శలు ఎదురుకాలేదని పేర్కొన్నారు. “నా క్యారెక్టర్ మీ కంటే చాలా బెటర్” అంటూ ఆమె చేసిన వ్యాఖ్యలు సోషల్ మీడియాలో వైరల్‌గా మారాయి. విమర్శలకు నేరుగా స్పందించే కంగనా తాజా పోస్ట్‌తో మరోసారి వార్తల్లో నిలిచారు.