పోలీసు ఉద్యోగాలపై కీలక నిర్ణయం..

తెలంగాణ పోలీసు నియామక మండలి (టీఎస్‌ఎల్‌పీఆర్‌బీ) పోటీ పరీక్షల నియామక ప్రక్రియలో పారదర్శకత, కచ్చితత్వాన్ని పెంచేందుకు కొత్త విధానాన్ని అమలు చేయనుంది. హోం తదితర శాఖల్లో పోలీసు పోస్టుల భర్తీకి దరఖాస్తు చేసుకునే ప్రతి అభ్యర్థికి ప్రత్యేకమైన యూనిక్‌ ఐడీని కేటాయించనుంది. దరఖాస్తు దశ నుంచి ఎంపిక కావడం లేదా పోటీ నుంచి తప్పుకునే వరకు అభ్యర్థికి సంబంధించిన పూర్తి వివరాలను ఈ ఐడీలో నిక్షిప్తం చేస్తారు. ఇందుకోసం ఫామ్‌-ఏ, ఫామ్‌-బీలతో కూడిన ప్రత్యేక ప్రొఫార్మాను రూపొందించారు. భవిష్యత్‌లో అభ్యర్థుల ఫిర్యాదులు లేదా న్యాయపరమైన వివాదాలు తలెత్తితే ఈ వివరాలు కీలకంగా ఉండనున్నాయి.

యూనిఫాం సర్వీసుల నియామకాల్లో రాతపరీక్షలతో పాటు శారీరక కొలతలు, శారీరక సామర్థ్య పరీక్షలు, కటాఫ్‌ మార్కుల కేటాయింపు వంటి పలు దశలు ఉంటాయి. ప్రాథమిక రాతపరీక్షకు ముందు పార్ట్‌-1 దరఖాస్తు, ఉత్తీర్ణత సాధించిన తర్వాత పార్ట్‌-2 దరఖాస్తు వివరాలను యూనిక్‌ ఐడీలో నమోదు చేస్తారు. అనంతరం పీఎంటీ, పీఈటీ, తుది రాతపరీక్షలో అభ్యర్థి ప్రతిభతో పాటు పూర్వచరిత్రపై స్పెషల్‌ బ్రాంచ్‌ విచారణ వివరాలను కూడా అందులో పొందుపరుస్తారు. ప్రతి దశకు సంబంధించిన సమాచారాన్ని ఒకేచోట భద్రపరచడం ద్వారా నియామక ప్రక్రియలో వివాదాలను తగ్గించాలని అధికారులు భావిస్తున్నారు.